Një çift brazilian, Manoel Angelim Dino, 105 vjeç, dhe Maria de Sousa Dino, 101 vjeç, kanë thyer zyrtarisht rekordin Guinness për martesën më të gjatë të një çifti të gjallë, pasi janë bashkë prej 84 vitesh e 85 ditësh.
Historia e tyre nisi në vitin 1936, kur u takuan për herë të parë, por u rilidhën në 1940, kur Manoel ra në dashuri me shikim të parë. Edhe pse në fillim nëna e Marias kishte dyshime, ai arriti ta bindte duke ndërtuar një shtëpi për familjen e tyre të ardhshme.
Gjatë viteve, çifti rriti 13 fëmijë dhe mbijetoi duke kultivuar duhan. Familja e tyre u zgjerua më tej me 55 nipër e mbesa, 54 stërnipër dhe 12 stër-stërnipër.
Tashmë në pleqëri, Manoel dhe Maria kalojnë ditët në shtëpi, duke shijuar jetën që kanë ndërtuar së bashku. Çdo mbrëmje, ata ulen për të dëgjuar lutjen e rruzares në radio, ndjekur nga Mesha në televizion. Kur u pyet për sekretin e dashurisë së tyre të qëndrueshme, Maria u përgjigj thjesht:
“Dashuria. Dhe kjo është diçka që as kompjuteri më i avancuar nuk do ta llogarisë dot kurrë.”
Edhe pse ata mbajnë rekordin aktual, martesa më e gjatë në histori mbetet ajo e David Jacob Hiller dhe Sarah Davy Hiller, të cilët qëndruan të martuar për gati 89 vjet.
