Për Aurela Gaçen nuk ka “të fshehta” për publikun. Këngëtarja është kaq transparente sa nuk ngurron të tregojë edhe detaje nga prapaskena e videoklipit të saj më të fundit, “Fustani”.
Një nga këto momente është edhe ai kur Aurela i këndonte “nuses”, që kishte zgjedhur si personazh për këngën.
“Ja ç’i punoja “nuses” mbas skene. Rri drejt tani i thashë edhe nusëro siç bënin nuset dikur. Ndërkohë Sirea e vogël xhironte skenat me gjyshin, ne këtej na mungonin vetëm sazet. Sigurisht kishim mundësinë të kishim fustane të ditëve të sotshme, por ngjarja e kujtimet e mija lidheshin me kohën kur nuset visheshin e zbukuroheshin kështu. E kush vendoste gjerdan në ballë, yhy, ishte nuse me tela ose nusja e vitit, siç i thonë sot. Unë nga Vlora, në Gjirokastër i këndoj nuses kënge Tironse”, shkruan Aurela Gaçe, krah videos së publikuar në prapaskenat e videoklipit.
Kënga, historia e vërtetë e Aurelës
Por për të gjithë ju që ende nuk e dinit, kjo këngë është një histori e përjetuar nga vetë Aurela Gaçe. Ajo na kthen në kohën e fëmijërisë së saj, kur madhështia e fustanit të një nuseje, e bëri që ta ëndërronte.
“Kam kthyer në këngë një histori personale me gjyshin tim… Kam qenë rreth 5 vjeç kur kam parë nuse për herë të parë dhe sipas tregimit të gjyshit, kam vrapuar në shtëpi dhe i kam thënë se do martohem. Ai me urtësinë që kanë vetëm gjyshërit më shpjegoi me fakte, se isha shume e vogël. Më uli ne divan dhe më tha: “Shiko, këmbët e tua duhet të takojnë tokën, atëherë do të të martojmë”. Por si fëmijë unë nuk ëndërrova martesën, sepse sigurisht as nuk e kuptoja. Unë u mahnita nga bardhësia e madhështia e fustanit të bardhë, u mahnita me figurën e një princeshe”, kujton Aurela.
