Travis Barker, bateristi i grupit rock Blink-182 dhe bashkëshorti i Kourtney Kardashian, është shtruar në spital në mënyrë të papritur. Muzikanti shkoi në Qendrën Mjekësore “West Hills” të martën në mëngjes pasi përjetoi një gjendje të keqe shëndetësore, raportoi fillimisht TMZ. Një ambulancë më pas e dërgoi atë në spital për kujdes shtesë. Megjithatë arsyet e shtrimit të tij në spital nuk janë bërë të ditura akoma.
Fotot tregojnë stafin mjekësor duke transportuar Barker në një barelë me Kardashian duke ecur përkrah tij. Mëngjesin e shtrimit në spital, Barker shkroi në Twitter: “Zoti më ruajt”. Sidoqoftë, është e paqartë nëse ai postim, kishte lidhje me problemet e tij mjekësore.
Vajza 16-vjeçare e Barker, Alabama Barker, u kërkoi ndjekësve të saj, “ju lutemi të dërgoni lutjet tuaja” në një postim në Instagram të martën në mbrëmje.
Në vitin 2018, Barker u shtrua në spital për shkak të mpiksjes së gjakut të gjetur në secilin krah. Përveç mpiksjeve, ai vuante nga një infeksion stafilokoksik dhe celuliti, një infeksion bakterial që mund të shkaktojë ënjtje, inflamacion dhe dhimbje.
Travis pati thënë se aksidenti me avion i vitit 2008 e çoi atë në spital me djegie të shkallës së tretë në 65% të trupit të tij. Ai tha se incidenti, në të cilin katër nga gjashtë pasagjerët vdiqën, e shtyu atë të hiqte dorë nga barnat.
Barker ka qenë në vëmendjen e publikut së fundmi për shkak të romancës së tij me Kourtney Kardashian. Çifti, pas disa muajsh lidhje në vitin 2021, u martuan në maj me një ceremoni luksoze në Portofino të Italisë.
