Vetëm pak ditë më parë Kanye West bëri të ditur se do të hapte 21 dyqane të përkohshme për fundjavën që lamë pas nën emrin “Pablo”. Ai zgjodhi SHBA-të, Australinë, Anglinë, Gjermaninë, Afrikën Jugore dhe Singaporin për të nxjerrë në shitje veshjet e dizajnuara prej tij.
Reperi e bëri të ditur lajmin të mërkurën, ndërsa postoi me anë të një fotografie hartën e dyqaneve, që qëndrojnë të hapura për tre ditë.
Por duket se organizimi nuk ishte bërë në mënyrën perfekte, pasi pati përplasje te disa prej dyqaneve. Në një dyqan në Nju-Jork, “Pagesix” raporton se fansat bënë kaos jashtë dyqanit ndërsa pritën për orë të tëra dhe shtynin.
Situata e pritjeve të gjata ishte në disa shtete, ndërkohë që shumë fansa u zhgënjyen pasi dolën nga dyqani. Ata u ankuan në rrjetet sociale për çmimet e shtrenjta të veshjeve, të cilat shkonin deri në 600 dollarë për një palë çizme dhe 3000 dollarë për një xhaketë.
Një fans postoi në “Twitter”: “Gjithçka doja ishte të blija këpucët e tua, por s’munda. S’më dilnin llogaritë, ato kushtonin më shumë se qiraja ime”. Në shfaqjen e mëngjesit të “The Breakfast Club”, Kanye e pranoi që çmimet ishin të shtrenjta për shumicën e njerëzve.
“Kjo ishte diçka që e vendosi kompania, por unë doja që të gjithë të kishin mundësi të blinin diçka”, tha Kanye.
Pavarësisht çmimeve të shtrenjta radhët nëpër dyqane vazhdojnë të jenë të gjata dhe deri tani ka patur goxha shitje, por akoma nuk bëhet e ditur sesa shkojnë shifrat. Sot është dita e fundit që dyqanet do të qëndrojnë të hapura.
Vetë reperi ndodhet në një turne në SHBA për promovimin e albumit të tij më të fundit “Life of Pablo”. Ai është bërë një stilist i kërkuar që pas prezantimit të koleksionit të tij të veshjeve në shkurt të këtij viti, në Javën e Modës në Nju-Jork.
Vetëm pak kohë më parë, revista “Forbes” e renditi çiftin West-Kardashian si më të pasurin e celebrities botëror me 100 milionë dollarë të ardhura secili për këtë vit.
*Shfleto galerinë
Burimi: Pagesix
