Disa panda femra janë vërejtur se simulojnë shenja shtatzënie me qëllimin e vetëm për të përfituar më shumë ushqim dhe vëmendje nga kujdestarët e tyre. Rasti më i njohur është ai i Ai Hin, një panda në Qendrën Kërkimore për Riprodhimin e Pandave Gjigande në Chengdu të Kinës.
Sipas mediave ndërkombëtare, Ai Hin filloi të shfaqte sjellje tipike të një panda shtatzënë, si mungesë oreksi dhe lëvizje të reduktuara. Si pasojë, ajo u transferua në një dhomë të veçantë me ajër të kondicionuar dhe iu ofrua një kujdes i veçantë, që përfshinte ushqime ekstra si fruta, ëmbëlsira tradicionale kineze dhe bambu të freskët. Por më vonë, testet konfirmuan se ajo nuk ishte në fakt shtatzënë.
Studiuesit dyshojnë se disa panda e mësojnë këtë sjellje me kalimin e kohës, duke kuptuar që “shtatzënia” sjell privilegje. Megjithatë, në disa raste këto sinjale mund të jenë pasojë e ndryshimeve hormonale, por në raste të tjera, duket se është një akt i pastër manipulimi… me qëllime të shijshme.
