Autoritetet italiane kryen një superoperacion për goditjen e një rrjeti të gjerë mashtrimi, me skemë të mirëfilltë kriminale që lëshonte diploma dhe certifikata false. Mes të arrestuarve është edhe pronari i Kolegjit Universitar Wisdom me qendër të Tiranë, Savino Cianci (i thirrur edhe Nino) dhe administratori Leonardo Catalano.
Të interesuarit që synonin të futeshin në administratë paguanin nga 8 mijë euro për të marrë një kualifikim për të hyrë në konkurse publike si dhe për të krijuar marrëdhënie pune, veçanërisht në sektorin e arsimit.
Sipas dosjes “Immediato”, ‘dyshja Cianci-Catalano në date 8 mars 2022 gjatë një darke në Tirane i kanë dhuruar një çantë Louis Vuitton me vlerë 1200 euro Shqiponja Telhaj (shënim në dosje është: Aquila Telhaj) presidentes së Këshillit të Akreditimit të Agjencisë për Akreditimin dhe Sigurimin e Cilësisë në Arsimin e Lartë, për akreditimin e Wisdom University’.
Shqiponja (Aquila) Telhaj, presidente e Këshillit të Akreditimit në Agjencinë për Sigurimin e Cilësisë në Arsimin e Lartë, ka reaguar në lidhje hetimet në Itali për skandalin e shitjeve të diplomave false në Universitetin Wisdom. Në një reagim në rrjetet sociale Telhaj thotë se s’ka pranuar kurrë dhuratë nga asnjë përfaqësues universitetesh të huaja apo shqiptare. Telhaj pretendon se nuk ka lidhje me dosjen e universitetit Wisdom, si dhe nuk i njeh përfaqësuesit e universitetit.
Në dosje përmendet dhe emri i ish ministres Evis Kushi për të cilën ishin përgatitur dhurata.
Kushi hedh poshtë faktin se si titullare e këtij institucioni për periudhën shtator 2020 – shtator 2023, të ketë shkëmbyer dhurata kortezie për urime festimesh me simbolika të tilla.
“Si titullare e këtij institucioni për periudhën shtator 2020 – shtator 2023, edhe pse ngrihen dyshime në media, nuk kam shkëmbyer asnjëherë dhurata kortezie për urime festimesh me simbolika të tilla”- tha Kushi.
