Pak ditë më parë “Iconstyle.al”, pas një vizitë të bërë në Manzë, konstatoi disa probleme tek banorët që jetonin në kontenierë pas tërmetit.
Të shqetësuar mbi 100 banorë tregonin se në kontenierë nuk kanë hapësire ku të gatuajnë dhe as për të larë rrobat.
Ata shpreheshin se vendosja e kontenierëve nga “TAP” ishte një zgjidhje e mirë, por nuk u plotëson të gjitha kushtet.
Pas këtyre ankesave, qeveria ka vendosur të gjejë një zgjidhje tjetër për t’u ardhur në ndihmë familjeve të prekura nga tërmete.
Pas një vizite të bërë në Manzë ministri Bledi Çuçi, ka parë nga afër vendin ku janë strehuar banorët dhe ka premtuar se qeveria do të marrë ambiente me qira për kuzhinë dhe lavanteri.
“Këtu çdo gjë është në rregull përsa i përket kanalizimeve, ngrohjes dhe ndriçimit. I vetmi problem deri më tani është një ambient i përbashkët për kuzhinë dhe lavanteri. Biseduam me administratorin dhe do të marrim një ambient këtu pranë me qira, për t’i dhënë zgjidhje përfundimtare kësaj çështje. Të gjithë banorët e prekur nga tërmeti i kemi sistemuar në kabina. Kjo është faza më e rëndësishme në kushtet e kësaj fatkeqësie natyrore. Për vlerësimin përfundimtar të godinave të dëmtuara do të vijë një tjetër grup i posaçëm”, tha ministri Çuçi.
Ndërkohë ai tregoi se qeveria do të garantojë bonusin e qerasë për banorët deri në maj të vitit 2021.
