Dje ministrja e Shëndetësisë, Ogerta Manastirliu paralajmëroi dënimin me gjobë 700 mijë lekë deri në mbyllje të aktivitetit, për subjektet në zonat turistike që nuk zbatojnë protokollet e sigurisë, me qëllim parandalimin e përhapjes së COVID-19.
Dhe teksa vëmendja i është drejtuar turizmit apo bizneseve, ndaj të cilave s’do të ketë tolerancë, le të mos harrojmë se virusi vijon të jetë aktiv në bashki, gjykata apo administratë, për të cilët gjithashtu duhet të mbahet përgjegjësi.
Para se të mbushim me gjoba një prej sektorëve më të prekur nga pandemia, siç është turizmi, duhet të dimë a respektohen masat dhe protokollet në këto institucione shtetërore?
Para se t’iu vihemi pas bizneseve që po e vuajnë më së shumti krizën ekonomike në vend, a nuk duhet të kemi shembuj nga administrata, ku të respektohet protokolli, të mbahet përgjegjësi për shëndetin e punonjësve duke i njoftuar ata për çdo rast infektimi.
Iconstyle.al raportoi për një të infektuar në Ministrinë e Energjetikës pak ditë më parë dhe një mungesë përgjegjshmërie për të mos njoftuar punonjësit e tjerë të ministrisë, që hyjnë e dalin të gjithë nga një derë!
Në një komunikim me zëdhënësin e ministrisë, ky i fundit e konfirmoi rastin pozitiv i cili është izoluar, ndërsa tha se “nuk mbyllet ministria me një të infektuar”!
Por në fakt raste të tjera kanë treguar se, deri në daljen e rezultateve të personave që kanë pasur kontakt me të infektuarin, veprimtaria është pezulluar.
Sot u raportua se Gjykata e Posaçme kundër krimit e korrupsionit është mbyllur pasi një gjyqtar karriere, që ka qenë në 3-4 javët e fundit në disa seanca gjyqësore, rezultoi pozitiv. Ajo do të vijojë të jetë e mbyllur deri në daljen e rezultateve të tamponëve të punonjësve.
Nga ana tjetër, Gjykata e Posaçme dhe SPAK janë në të njëjtën godinë, dhe SPAK ende vijon punën. A është normale kjo?
Edhe një kopsht fëmijësh në Tiranë është mbyllur përkohësisht, pasi ka dalë pozitive me COVID një punonjëse, e cila prej 4 ditësh ka qenë me raport.
Gjithashtu këtë të premte u raportua se njësia vendore e Kujdesit Shëndetësor në Berat është kthyer në vatër e COVID-19, por drejtori i këtij institucioni refuzon që ta mbyllë.
Pra çështja që ne ngremë është, a duhet të aplikojmë gjoba për bizneset e pezullim të aktivitetit të tyre, kur vetë zyrtarë administrate po shkelin masat anti COVID-19, duke mos pasur kujdes dhe duke rrezikuar punonjësit e vet! A nuk është ligji i barabartë për të gjithë, apo jemi të ndarë, ca të nënës e ca të njerkës!
/Iconstyle.al
