Shumë shpejt, qyteti antik i Butrintit do të menaxhohet nga një agjenci e re e cila njihet si “Fondacion”, mirëpo nuk ka asnjë të dhënë tjetër përveç faktit që do të jetë një partneritet mes Ministrisë së Kulturës dhe një partneri strategjik. (Lexo këtu)
Për Butrintin, kjo do të jetë hera e parë që do të menaxhohet edhe nga një subjekt jo-publik dhe emra të njohur të trashëgimisë kulturore shqiptare janë të shqetësuar për menaxhimin e kësaj pasurie nga fondacione jo-shtetërore.
Ish-drejtori i Parkut Kombëtar të Butrintit, Auron Tare, ka kritikuar publikisht planin e qeverisë për t’i kaluar një subjekti të huaj menaxhimin e Butrintit. Sipas tij, kjo është një mënyrë e gabuar për të menaxhuar pasurinë e vendit.
Ai shtoi se një praktikë e tillë nuk ndiqet në asnjë vend tjetër të Evropës dhe mund të praktikohet vetëm në vende në rrezik apo që janë në luftë. Tare tregoi se një veprim i tillë mund të kthehet në precedent dhe të tjera fondacione të huaja mund të kërkojnë të menaxhojnë pasuri të trashëgimisë sonë.
I shqetësuar për këtë çështje ka qenë edhe gazetari Julio Dine, i cili duket se ka pasur më herët informacion për atë që do të ndodhë me Butrintin.
Julio Dine ka denoncuar me foto personat përgjegjës për marrëveshjen e fshehtë të Butrintit.
Ai ka publikuar foton e personave që udhëtuan 1 vit më parë drejt Korfuzit në portin e Sarandës, për të bërë marrëveshjen e Butrintit që flitet sot.
Postimi i plotë i gazetarit:
“Butrinti i jepet privatit ⁉Ne 12 tetor të një viti më parë denoncova një takim të fshehtë të 25.08.2019 në Korfuz, ku u diskutua dhënia e Butrintit tek një Fondacion i huaj. Sot po publikoj fotot ekskluzive të personave dhe automjetit që udhetuan me traget nga Saranda për në Korfuz. A mund të jepet trashegimia jonë tek të huajt?”
Rreth kësaj çështjeje, Ministria e Kulturës ka shpjeguar për mediat se “Fondacioni” i ri do të krijohet përmes një marrëveshjeje bashkëpunimi me një partner strategjik, ndërsa “organizimi dhe funksionimi i “Fondacionit” do t’i nënshtrohen legjislacionit për organizatat jofitimprurëse”.
Kjo marrëveshje mes Ministrisë së Kulturës dhe fondacionit të ri duhet të miratohet në Parlament.
