Mide Dumani është një nënë nga Tirana, e cila prej pesë vitesh është në kërkim të kthimit të fëmijëve të saj nga Siria.
Në vitin 2014 bashkëshorti i saj, Shkëlzen Dumani e ka mashtruar atë duke i thënë se po shkonte me fëmijët në Malin e Zi por në të vërtetë iku në Siri.
Pak muaj pasi shkoi në Siri Shkëlzeni u vra duke luftuar përkrah grupit militant islamik.
Pas vdekjes së të atit fëmijët mbetën të vetëm dhe nëna e tyre rrëfen se e gjyshja udhëtoi për në Siri që t’ju qëndronte pranë, ndërsa vetë ajo vuan prej pesë vitesh mungesën e vajzas dhe të djalit.
Kur Shkëlzeni u vra, vajza ishte 8 vjeç ndërsa djali vetëm 5 vjeç. Në Siri ata kanë emra arabë dhe të dy po kërkohen edhe nga Interpoli.
“Po si çdo nanë që thonë, ku të rrijë fëmija të rrijë edhe nëna. Mendja është gjithmonë atje pavarësisht që u bënë 5 vjet këtu. Ata që janë prindër mund ta besojnë këtë që më ka ndodhur mua, tjetërkush nuk mund ta besojë”, shprehet Mide.
Nëna e fëmijëve bën me dije se daja i tyre ka kërkuar ndihmën e autoriteteve shqiptar për kthimin e nipit dhe të mbesës.
Tani vajza duhet të jetë 14 vjeçe e djali 12 vjeç. Ata jetojnë tani në kampin al-Hol në Siri.
