Pavarësisht se flasim për emancipimin e femrës, jashtë ekranit të televizorit ajo që ndodh është shumë. Gratë shqiptare shikohen nga partnerët e tyre si pronë dhe këta të fundit nuk ngurrojnë t’u marrin jetën.
Shqipëria është vendi me nivelin më të lartë të vrasjeve nga partnerët intimë në Europë. E dhëna u publikua nga Zyra e Kombeve të Bashkuara për Krimet dhe Drogën (UNODC), në një raport të fundit të saj “Studimi global për vrasjet e lidhura me gjininë për gratë dhe vajzat”.
Sipas të dhënave, Shqipëria ka nivelin më të lartë të vrasjeve nga partnerët intimë, me 0.7 vrasje për 100 mijë gra, sipas të dhënave që i referohen vitit 2016. Ky është niveli më i lartë në Europë. Pjesa më e madhe e vrasjeve të grave në Shqipëri kryhen pikërisht nga partnerët e tyre (në total vrasjet e grave janë 1 për 100 mijë).
Pas Shqipërisë, në vend të dytë është Islanda me 0.6 vrasje për 100 mijë gra, e ndjekur nga Kroacia (0.5), Lituania (0.5), Finlanda (0.4) dhe Zvicra (0.4).
Vrasjet më të larta të grave (jo nga partnerët) janë në Lituani me 2.9 për 100 mijë gra, 0.5 prej të cilave nga partnerët intimë.
Gratë e vrara nga partnerët intimë ose anëtarët e familjes përbëjnë 58% të të gjitha vrasjeve.
Nga ana tjetër INSTAT tregoi se ka një rritje të numrit të raportimeve për dhunën në familje ndaj grave. Gjatë 2017-s, për çdo 10 mijë gra numëroheshin 22.7 gra të dhunuara në rang kombëtar.
Qarku i Durrësit ka normën më të lartë të grave të dhunuara. Sipas të dhënave të INSTAT për çdo 10 mijë gra në Durrës kishte 32 gra të dhunuara, apo rreth 11 gra më shumë se mesatarja kombëtare. Qarku i Durrësit është i përbërë nga 3 bashki të mëdha: Durrës, Shijak dhe Krujë.
Burimi: Monitor
