Gratë mund të përfshihen në qeverinë e re të talebanëve, por do të kenë role jo shumë të rëndësishme dhe nuk do të jenë në pozicione udhëheqëse. Ky lajm është dhënë nga vetë talebanët në disa intervista, ku kanë folur për rolin e grave, që tashmë duhet të ndjekin rregullat e vendosura nga talebanët.
Gratë do të mund të vazhdojnë punët e tyre dhe t’i bashkohen qeverisë së re, por vetëm duke përmbushur disa detyra jo të rëndësishme dhe duke ndjekur rregullat e Sherihatit, që njihet ndryshe si ligji i Islamit. Gratë në Kabul nuk do të kenë pozicione udhëheqëse, por vetëm do të punojnë në ministri, që do të formohen brenda javës së ardhshme, kur do të zyrtarizohet edhe qeveria e talebanëve.
Një zëdhënës i talebanëve ka thënë për “BBC” se gratë që kanë punuar në ministri në Afganistan duhet të rikthehen në punë, por me qeverinë e re që do të prezantohet së shpejti, në postet më të rëndësishme do të vendosen vetëm burrat.
Zyrtarët ju kanë kërkuar afganëve që të rikthehen në shtëpitë e tyre dhe të ndihmojnë në rindërtimin e vendit. Ata kanë premtuar se do të mbrojnë të drejtat e njerëzve, duke u përpjekur që të shfaqen më pak të ashpër me qëndrimet e tyre.
Më shumë se 123 mijë njerëz u evakuuan me avionë nga Afganistani, pasi talebanët pushtuan sërish vendin në mes të muajit gusht.
