Paketa e re e ndryshimeve e depozituar në Kuvend ditën e sotme për ndryshimet në Kodin Penal ka shkaktuar bujë në rrjet. (lexo këtu)
Në draft parashikohet se krijuesi i memeve do të dënohet deri në 1 vit burg. Por ky draft, i realizuar nga ministrja e Drejtësisë, Etilda Gjonaj, parashikon penalitete të rënda edhe për mediat, drejtuesit e tyre, por edhe qytetarët.
Konkretisht në nenin 238 të ligjit thuhet se:
1. Publikimi në cdo formë, mënyrë apo mjet i një montazhi të realizuar me fjalët ose imazhin e një personi pa pëlqimin e tij, nëse kryhet për qëllime përfitimi material ose jo material, apo kur ka qëllim të dëmtojë reputacionin e një personi, kur materiali nuk shfaqet dukshëm që është një montazh ose nëse nuk përmendet shprehimisht se eshtë i tillë, përbën kundrvajtje penale dhe dënohet me burgim deri në 1 vit.
2. Ndjekja penale fillon me ankim të viktimës ose përfaqësuesit ligjor të saj dhe pushon me tërheqjen prej saj.
Kaq ka mjaftuar që të gjithë ta kundërshtojnë këtë propozim, teksa kryeministri Rama ka mohuar këto zëra në rrjetet sociale ku thotë se nuk ka asnjë shans të ndalohen memet me ligj, ndërsa ironizon autorët e tyre.
“Shih shih qenkan revoltuar ca analistë se do u dënokan memet me Kod Penal, duke u nisur nga s’di ç’material jozyrtar! Po si mund të ndalohen memet me ligj na e thonë dot këta orakuj të kombit? Asnjë shans s’ka, ku ta gjenim që dhe këta të merreshin me meme që të vlenin për diçka!“, shkruan Rama.
