Kur kënaqeni me disa pije më shumë në mbrëmje, gjithçka ju duket mirë. Problemet shpesh vijnë të nesërmen, kur zgjoheni me dhimbje të tmerrshme koke duke i premtuar vetes se nuk do ta prekni më kurrë alkoolin gjatë gjithë jetës suaj. Epo, ndoshta mund të ketë një zgjidhje, një pilulë specifike ka hyrë në shitje në Britani për të parandaluar dhimbjen e kokës pas pijes së tepërt.
Është një probiotik, 100% natyral dhe vegan, i cili vepron duke përshpejtuar shpërbërjen e alkoolit në trup. Për arsye se nuk klasifikohet si ilaç, nuk kërkohet as miratimi nga “MHRA”, ose agjencia britanike përgjegjëse për rregullimin e barnave. Kompania suedeze “Myrkl”, prodhuese e produktit, ka raportuar se të gjithë përbërësit janë të sigurt për konsum dhe janë miratuar nga agjencitë e standardeve ushqimore. Studimi shkencor që vërteton efektivitetin e tij u botua në “Journal Nutrition and Metabolic Insights”. Studiuesit rekrutuan 24 persona dhe i ndanë pjesëmarrësit në dy grupe, njërit grup ju dha placebo dhe tjetrit probiotiku, duke gjetur përfitime të mëdha tek ky i fundit.
Håkan Magnusson, CEO i kompanisë, ka bërë një sqarim në lidhje me përdorimin e tij, produkti nuk ka si qëllim të jetë në asnjë mënyrë një nxitje për abuzimin me alkoolin, por një ndihmë për “konsumatorët e rregullt të moderuar”. Konsumimi i alkoolit është i lidhur me kulturën e shumë vendeve në botë,mbi të gjitha me Anglinë.
“Qëllimi i Myrkl është të ndihmojë përdoruesit e rregullt të alkoolit të zgjohen sa më mirë të nesërmen, qofshin ata profesionistë, prindër të rinj apo të moshuar që duan të mbajnë një jetë aktive shoqërore”, tha Håkan.
Pilula nuk do të gjendet në farmaci, por vetëm online me çmimin 30 paund për 30 kapsula. Për efekt maksimal, duhet të merren dy pilula një orë para konsumimit të alkoolit.
