Brad Pitt ka paralajmëruar Angelina Jolie se është gati për të luftuar për kujdestarinë e përbashkët të fëmijëve, pas pretendimeve se ajo iu drejtua atij me shprehjen “Nuk mundem më”, para se t’i kërkonte divorcin.
Pitt thuhet se është i “zemëruar” me Jolie për divorcin, një vendim që ai thotë se i vendos fëmijët në rrezik, ndërsa burimet thonë se nuk ka “asnjë shans” që t’i lejojë asaj që të marrë kujdestarinë e plotë.
Burime pranë Pitt thanë për TMZ, se ai është i inatosur me bashkëshorten e tij për rrëfimin e tregimeve se ai është një rrezik potencial për fëmijët e tyre, për shkak të problemit me zemërimin dhe abuzimin me substancat.
Pitt raportohet se aktorja “ka hapur portat e ferrit”, sepse e gjithë familja është vënë në shënjestër të paparazz-eve, pas raportimeve se një “incident shokues” mund të jetë bërë shkak për divorcin.
Pitt tha se donte që ta mbante divorcin nën kontroll për të mirën e fëmijëve të tyre.
Gjatë ditëve të fundit, Pitt ka biseduar me Jolie për ta përballuar divorcin “si të rritur”. Shtëpia e yjeve të “Hollywood”-it është tani e rrethuar nga fotografët, shtuar patrullimin e Policisë së Los Angeles, për shkak të mediave.
Jolie nënshkroi divorcin nga Pitt “për të mirën e familjes”, dy vite pasi çifti u martua në rezidencën e tyre në Francë.
Aktorja thuhet se kërkoi divorcin për shkak të mënyrës që Brad edukonte gjashtë fëmijët, Maddox, 15 vjeç, Pax, 12 vjeç, Zahara, 11 vjeç, Shiloh, 10 vjeç dhe binjakët Vivienne dhe Knox, 8 vjeç.
Ishte Brad Pitt ai që theu heshtjen pas lajmit të divorcit me Angelina Jolie-n. Në një deklaratë zyrtare për “People”, ai tha se tani e tutje fokusi do të jenë fëmijët.
“Jam tepër i trishtuar nga kjo, por e rëndësishme tani është mirëqenia e fëmijëve tanë. I kërkoj me mirësjellje shtypit që t’u japë atyre hapësirën që meritojnë në këtë kohë të vështirë”, tha Pitt.
Angelina Jolie, e cila bëri kërkesën për divorc nga partneri prej 12 vitesh, dha gjithashtu një deklaratë përmes përfaqësuesve, ku u shpreh se “ishte një vendim për hir të një ambienti të shëndetshëm familjar”. Zëdhënësi shtoi se “Angelina nuk do të komentojë më gjatë dhe lutet të ruhet privatësia e familjes gjatë kësaj faze të vështirë.”
Pitt pretendon se gjithçka është bërë pas shpinës së tij dhe se e ka marrë vesh lajmin e divorcit, vetëm një ditë para se aktorja të firmoste.
Një tjetër burim pranë çiftit rrëfeu për “Page Six” se historia e Brad me aktoren franceze Marion Cotillard, që u tha se ishte vendimtare në divorcin e çiftit, “është 100 % e rreme” dhe se aktori për momentin është i shqetësuar vetëm për fëmijët e tyre.
Burimi gjithashtu tha se Jolie ishte aq xheloze, saqë refuzoi ta takonte aktoren franceze në sheshxhirimin e filmit ”Allied”, ndonëse ajo ishte afruar që t’i fliste.
Burimi: Daily Mail/ TMZ
