Kanë kaluar vetëm pak javë që kur shqiptarët mundën të linin pas muajt e karantinës dhe t’i rikthehen normalitetit, por duket se kjo liri ka marrë përmasa të frikshme në vendin tonë dhe shumë shpejt mund të cënohet sërish!
Ulja e vigjilencës dhe moszbatimi i rregullave të përcaktuara nga autoritetet shëndetësore, ka sjellë sipas Ministrisë së Shëndetësisë, rritjen e numrit të të infektuarve ditorë me koronavirus, që sot ishte 69.
Por ndonëse këto ditë kemi pasur shifra të larta të infektuarish, është krijuar një moskokëçarje në mesin e qytetarëve dhe një lloj skepticizmi në lidhje me situatën që i bën njerëzit të mos respektojnë distancën dhe të mos mbrohen me maska në vende publike.
Na vjen keq të themi që ka shumë qytetarë që mendojnë se e gjithë kjo puna e të infektuarve është një mashtrim, ose një lloj politike a skemë për të arritur kushedi se çfarë. Mjafton të shohësh deklaratën e bërë pak më parë nga këngëtari Labinot Tahiri, i cili tha se “virusi është një gënjeshtër”, për të kuptuar se nuk po e marrim aq seriozisht sa duhet situatën.
https://www.instagram.com/p/CBdhYJ9ghCW/
Edhe komentet në faqen e iconstyle.al në lidhje me “mashtrimin me shifrat e larta të të infektuarve”, tregojnë fatkeqësisht se mungon një dozë e lartë ndërgjegjësimi në vend për seriozitetin e situatës.
Nëse nuk duam që të infektohemi, ose më e pakta, t’i rikthehemi qëndrimit të detyruar në shtëpi, atëherë duhet të tregojmë sa më tepër kujdes. Dy javët e fundit na treguan se nuk kemi më kujdes si më parë, përkundrazi, me hapjen e vendit, po shohim njerëz të pambrojtur në plazh, rrugët dhe lokalet plot, njerëz që nuk respektojnë as distancën minimale në punë, dyqan, që afrohen në vend publike pa maska dhe pa kurrëfarë kujdesi. Janë pikërisht këta shkaktarë që sot kemi më shumë të infektuar ditorë sesa në pikun e pandemisë në mars.
Sot më shumë se kurrë, është koha të veprojmë sa më shpejt për të mos u kthyer pas! Askush nuk po mjaftohet aktualisht me një buletin ditor të ministrisë për të infektuarit, apo intervistat e përditshme të mjekëve Infeksionistë që po përsëritin të njëjtat gjëra në çdo televizion: “Do të kthehet apo jo virusi në shtator?!”, në një kohë që ai nuk ka ikur ndonjëherë!
Duhen dëshmi! Dëshmi të personave të infektuar, të atyre që e kanë përjetuar nën lëkurën e tyre virusin, frikën e humbjes së një të afërmi. Institucionet Shëndetësore duhet të ndërgjegjësojnë qytetarët duke lejuar mediat të sigurojnë dëshmi dhe përjetime të të mbijetuarve nga COVID-19, ose dhe atyre që ende po luftojmë me virusin nga vetëkarantinimi.
Njerëzit duhet të dinë si u infektuan pacientët e Infektivit duke mos treguar kujdes në ndërmarrje, zyra, aktivitete biznesi, duke vizituar një të afërm etj, gjithçka që mund të tregojë se një veprim i pamenduar, sado i parëndësishëm në dukje, mund të sjellë infektimin me virus nëse nuk u përmbahemi rregullave.
Nisur nga situata serioze e pandemisë në vend, Instituti i Shëndetit Publik ka parajmëruar edhe mungesën e kapaciteteve për të kryer më tepër testime në vend! Jo më larg se dje u publikua një dokument i ISHP në media, që i drejtohej Ministrisë së Shëndetësisë, me kërkesën për kryerjen e testimeve për efekt dokumentacioni në laboratorë jashtë, duke nënkuptuar ata privatë.
Në një kohë që edhe institucionet shëndetësore po flasin për situata emergjente në vend, dhe mungesë kapacitetesh për të trajtuar pandeminë, atëherë nuk mund të mbyllim sytë dhe veshët përpara kësaj situate dhe të mendojmë se jemi të paprekshëm nga COVID-19!
Duhet ta marrim seriozisht situatën para se të infektohemi ne ose personat tanë të dashur, pasi virusi NUK KA IKUR!
/Iconstyle.al
