Spanja është goditur nga një stuhi “Filomena”, që është shoqëruar nga reshje të dendura bore dhe në gjysmën e shtetit është ndezur alarmi i kuq. Të gjitha linjat ajrore dhe hekurudhore në Madrid janë mbyllur për shkak të stuhisë së borës.
Ditën e premte në Madrid u shënuan reshjet më të mëdha të borës që nga viti 1971. Për shkak të stuhisë në Spanjë janë konfirmuar edhe 3 viktima dhe agjencia spanjolle e motit i ka përshkruar këto kushte si “të jashtëzakonshme dhe me shumë gjasa historike” të shkaktuara nga Stuhia Filomena.
Në Madrid, që është edhe një nga zonat më të prekura nga stuhia, pritet që në 24 orët e ardhshme të bjerë borë deri në 20 centimetra. Ndërkohë BBC ka raportuar se stuhia Filomena pritet të lëvizë drejt Evropës Lindore, kryesisht në Ballkan. Fillimisht do të preken Shqipëria dhe Greqia, ku nuk do të mungojnë reshjet e denura të shiut dhe të borës.
Më pas nga stuhia do të goditet edhe pjesa qendrore e Ballkanit dhe Veriu i Italisë. Moti ekstrem dhe temperaturat e ulta pritet të vazhdojnë edhe gjatë fundjavës me temperaturat në Madrid që parashikohet të arrijnë deri në -12C të enjten. Mbrëmjen e kaluar ushtria doli në terren, ndërsa qytetarët janë këshilluar të shmangin lëvizjet e panevojshme.
