Nuk keni pse të jeni më pre e burokracive për të tërhequr pakot nga blerjet online! Nëse keni bërë një blerje online mbi 22 euro, mbi të cilën duhet të paguani edhe TVSH-në, atëherë nuk jeni të detyruar të shkoni në qendrën tranzitore të Postës Shqiptare për të marrë mandatin, më pas në bankë për të bërë pagesën dhe për t’u kthyer sërish në këtë qendër për të tërhequr pakon.
Tashmë mjafton që të shkoni në Zyrën Qendrore Postare të qytetit ku jetoni, për të kryer procedurat e zhdoganimit dhe për të tërhequr direkt kolipostën.
Posta Shqiptare gjeti zgjedhje duke ndjekur këtë mënyrë veprimi, fillimisht plotësimin e deklaratës doganore në mënyrë elektronike dhe më pas arkëtimin e detyrimit doganor pranë këtyre zyrave.
Qytetarët që zgjedhin t’i kryejnë procedurat në Zyrat Qendrore të Postës Shqiptare, duhet të paguajnë një komision me vlerë 100 lekë. Megjithatë as kjo nuk është zgjidhja më e mirë e mundshme, pasi duke u vënë në funksion të këtij shërbimi vetëm një zyrë në çdo qytet, pritet që të krijohen radhë të gjata qytetarësh dhe kryesisht në Tiranë, ku numri i popullsisë është më i lartë.
Burimi: Posta Shqiptare
