Blendi Fevziu e ka shprehur gjithmonë pasionin e tij të madh për udhëtimet. Gazetari ka udhëtuar në 102 vende të botës, ama kujtimi më i paharruar për të është udhëtimi i tij i parë, ai në Itali në vitin 1992, së bashku me mikun e tij Armand Shkullaku.
I ftuar në emisionin “Pushime on Top”, Blendi rrëfeu se ishte vetëm 21 vjeç kur fluturoi për herë të parë me avion për të vizituar një shtet të ri, që siç tregon ai një botë tjetër nga Shqipëria.
“Atë udhëtim nuk do ta harroj asnjëherë. Isha vetëm 21 vjeç dhe bashkë me Mand Shkullakun, u përballëm me ndryshimin e madh midis dy botëve. Ne as nuk kishim hipur ndonjëherë në avion, as nuk kishim hipur në ashensor, as nuk kishim marrë ndonjëherë shkallët lëvizës. Ishin kursimet e familjes prej 30-vjetësh. 50 dollarë që mendonin se ç’do na bënin, por në të vërtetë, nuk flinim dot as një natë, kështu që kemi fjetur jashtë…” – tha Blendi me të qeshur.
Blendi tregoi se nëse nuk do të ishte gazetar, do të punonte pranë një agjencie udhëtimi për t’u treguar dhe për t’i orientuar njerëzit drejt destinacioneve pak më larg Europës. Ai sugjeroi të gjithë të rinjtë të kursejnë dhe të udhëtojnë sa më shumë.
