Të gjithë bashkë për t’u ardhur në ndihmë të prekurve nga tërmeti!
Kjo është motoja që po ndjekin sot të gjithë ata persona apo biznese, të cilët janë solidarizuar me situatën e vështirë në të cilën po kalon vendi ynë pas tërmetit shkatërrues 6,4 ballë të së martës.
Si rrallëherë në situata të tilla që kërkojnë ndjeshmëri të lartë, bizneset private italiane dhe ato shqiptare, janë bashkuar për të sjellë ndihma të specializuara për shqiptarët në nevojë.
Në mesin e tyre janë edhe partnerët italianë të Welcome Albania që kanë sjellë në Shqipëri një grup të specializuar emergjencash me pajisjet më të fundit për t’u ardhur në ndihmë të prekurve nga tërmeti.
Giuseppe Trisolini nga Tourmake; Vincezio Chimisio, Konsull Nderi i Shqipërisë në Itali; Iv Tase nga Welcome Albania dhe Alketa Elezi nga Dhoma e Ndërmjetësimit; janë angazhuar për të sjellë këtë grup të nevojshëm specialistësh.
Më konkretisht, në këtë mision janë angazhuar 4 autoambulanca, dhe 30 vetë staf që është i specializuar në dy fusha, atë të nxjerrjes së njerëzve nga rrënojat dhe mbajtja e tyre në jetë.
Menjëherë pas mbërritjes ka nisur angazhimi për gjetjen e njerëzve nën rrënoja me anë të pajisjeve të specializuara dhe kamerave termike. Persona të tjerë kanë vrapuar drejt autoambulancave ku kanë marrë trajtimin e nevojshëm pas traumës nga tërmeti.
Pas mbërritjes në Durrës dhe Thumanë, ky grup i specializuar do të ngrejë disa çadra nëpër fshatra të ndryshëm, për t’i ardhur në ndihmë komunitetit edhe në ato zona që janë lënë disi mbas dore.
Ky veprim është vërtet emocionues dhe për t’u vlerësuar çdo ndihmë sado e vogël për të prekurit nga tërmeti!
/Iconstyle.al
