Gjatë një bisede emocionale me Yllin në Ferma VIP 2, Big Mama ndau një histori prekëse nga jeta e saj, duke folur për lidhjen e fortë që kishte me babanë dhe dhimbjen e madhe që përjetoi pas humbjes së tij.
Ajo pranoi se në fillim nuk e kishte imagjinuar kurrë që ai do të largohej nga jeta dhe se humbja e tij e kishte tronditur thellë. Në momentet e para, kishte menduar se nuk do ta përballonte dot dhimbjen, madje kishte frikë se mund të merrte ndonjë vendim drastik.
“Me babin kam qenë shumë e lidhur dhe nuk e kam menduar kurrë që do të vdiste. Thoja nëse ai vdes, garant që kam për të bërë vetëvrasje, por ama njeriu mësohet. Madje ka vdekur në duart e mia dhe vetë dija ta menaxhoja situatën dhe të organizoja gjithçka,” u shpreh ajo.
Pavarësisht dhimbjes së thellë, Big Mama tregoi se kishte gjetur forcën për ta përballuar situatën dhe për t’u kujdesur për gjithçka në ato momente të vështira. Rrëfimi i saj emocionoi jo vetëm banorët e fermës, por edhe publikun që e ka ndjekur nga afër këtë moment të sinqertë.
