Një nga pasojat që po lë pas COVID është rënia e lindjeve. Qytetet e Shqipërisë po “plaken” me shpejtësi dhe rritja natyrore është ndalur në vend, nga lindjet e pakta. Rritja natyrore më e vogël regjistrohet qarkun e Korçës, ku vdekjet tejkalojnë me 113 numrin e lindjeve, sipas të dhënave të tremujorit të tretë 2020, të publikuara nga INSTAT.
Lindjet
Numri i lindjeve për tremujorin e tretë 2020 është 7.386, duke shënuar një rënie me 4,6 %, krahasuar me tremujorin e tretë 2019.
Në këtë periudhë vetëm një qark i vendit ka shënuar rritje të numrit të lindjeve, në krahasim me të njëjtën periudhë të vitit 2019, ndërsa në njëmbëdhjetë të tjerët kanë rënie. Numri më i madh regjistrohet në qarkun e Tiranës, me 2.484 lindje, ndërsa ai më i vogël në qarkun e Gjirokastrës, me 143 foshnja të sjella në jetë.
Por ky qark ka qenë edhe më keq. Rritjen më të madhe në përqindje të lindjeve, krahasuar me të njëjtën periudhë të vitit 2019 e ka qarku i Gjirokastrës me 17,2 %, ndërsa rënien më të madhe e ka qarku i Vlorës, me 25,2 %.
Sipas statistikave të marra nga zyra e gjendjes civile në Bashkinë e Ersekës, përgjatë vitit kanë qenë vetëm 10 fëmijë të regjistruar pranë kësaj zyre.
Sipas vet banorëve, shkaqet e kësaj uljeje drastike kanë qenë papunësia, emigracioni, por edhe sëmundja e COVID-19 .
Varfëria duket se është një ndër faktorët kryesorë që frenon çiftet e reja të krijojnë familje e të bëjnë fëmijë.
Sipas të dhënave nga zyra e arkivës në këtë Bashki, trendi ka qenë gjithmonë në ulje, ku në 2019 numëroheshin 33 lindje, ndërkohë në 2020 vetëm 10.
Vdekjet
Në tremujorin e tretë 2020, në të dymbëdhjetë qarqet e vendit shënohet rritje e numrit të vdekjeve, në krahasim me të njëjtën periudhë të vitit 2019.
Në këtë periudhë, numri më i vogël i vdekjeve regjistrohet në qarkun e Kukësit, me 138 vdekje, ndërsa ai më i lartë në qarkun e Tiranës, me 1.706 vdekje.
Shtesa natyrore
Shtesa natyrore e popullsisë shpreh rritjen/rënien e popullsisë, si rezultat lindjeve dhe vdekjeve të saj gjatë një periudhe kohe. Ky tregues shprehet si diferencë ndërmjet lindjeve dhe vdekjeve.
Numri i vdekjeve për tremujorin e tretë 2020 rezulton 6.294, duke shënuar një rritje prej 25,7 %, krahasuar me tremujorin e tretë 2019. Gjatë tremujorit të tretë 2020, numri i lindjeve tejkalon me 1.092 numrin e vdekjeve.
Cilat foshnje regjistrohen?
Të dhënat e lindjeve sipas gjinisë sigurohen nga Drejtoria e Përgjithshme e Gjendjes Civile, e cila dërgon në INSTAT vetëm numrin e lindjeve të banuesve në Shqipëri. Konsiderohen të gjitha lindjet e banuesve në Shqipëri gjatë periudhës referencë, duke mos marrë parasysh lindjet e banuesve jashtë Shqipërisë (emigrantëve), edhe pse mund të regjistrohen në zyrat e gjendjes civile, pranë ish-vendbanimeve të tyre.
