Kanë kaluar disa javë që kur emisioni investigativ “Stop” transmetoi për herë të parë skandalin seksual në shkollën e mesme artistike “Jakov Xoxa” në Fier, i cili u thellua javë pas jave.
Mësuesi Agron Bego i ofronte ndihmë një nxënëseje që kishte bërë mungesa, duke i kërkuar në këmbim favore seksuale, madje i tregoi se kishte punuar edhe zhigolo në shtëpi publike dhe ishte i të “99-tave”, teksa e “këshillonte” vajzën të mos kryente marrëdhënie me bashkëmoshatarë, pasi ata nuk dinë.
Pas publikimit të këtij skandali, Bego u pezullua nga shkolla dhe ndaj tij u mor masa e arrestit “burg pa afat”, teksa rasti po hetohet nga prokuroria, teksa emisioni zbuloi se në skandal ishin të përfshirë edhe mësues të tjerë.
Kështu, pas Begos u denoncua dhe Vasil Niko, i cili kishte shkëmbyer mesazhe me një nxënëse.
Pas këtij skandali që tronditi të gjithë opinionin publik, pati persona që kërkuan shpjegime nga Ministria e Arsimit, madje disa të tjerë i kërkuan ministres Besa Shahini të dorëhiqet.
Vetë Shahini, reagoi me anë të një statusi në Facebook, ku u shpreh se shfrytëzimi i viktimave të abuzimit për të tërhequr vëmendjen është poshtërsi dhe se asnjë rast i i dhunës dhe abuzimit nuk do të tolerohet.
Po ashtu, theksoi se do të luftojë edhe shfrytëzimin e viktimave të abuzimit, pasi siç shprehet ajo, ky është një abuzim më vete.
Skandali i mësuesit ‘zhigolo’! I kërkuan dorëheqjen, reagon për herë të parë Besa Shahini
Së fundmi, Shahini në fjalën e saj në Kongresin Zgjedhor të Partisë Socialiste ka shigjetuar dy drejtuesit e emisionit “Stop”, Saimir Kodra dhe Gent Zenelaj.
Madje, ajo i ka akuzuar edhe për ngacmime seksuale në mënyrë të tërthortë, pasi u shpreh se ato emisione(që kanë publikuar skandalin seksual), në vend që t’i trajtojnë me ndjeshmëri këto çështje, i publikojnë dhe mbase ngacmojnë edhe vetë trupat e vajzave që vallëzojnë në atë emision, referuar velinave.
“Por sot gruaja ka guximin që ta denoncojë fort. Por mediat në vend që t’i trajtojë me ndjeshmëri, i nxjerrin në emisione dhe spekulojnë vetëm për të tërhequr shikueshmëri. Nuk janë as vetë të vetëdishëm për hipokrizinë e tyre, ku gjoja brengosen për ngacmim, ndërsa ndoshta ngacmojnë edhe vetë trupat e grave të reja që vallëzojnë aty në emision. Hapësira ku denoncohet abuzimi duhet të jetë e sigurt,”– tha Shahini.
Nuk dihet nëse ministrja e ka thënë diçka të tilla nga fakti që skandali mori dhénë apo ajo realisht ka prova për deklaratën e saj.
/GazetaReforma.com
