Këngëtarja dhe vajza e politikanit të majtë Koço Kokëdhima, Besa u shpreh hapur për protestat e djeshme në një postim publik në Instagram.
Teksa promovoi në Instastory edhe kongresin e parë të partisë “Zgjidhja”, themeluar nga i ati, Besa Kokëdhima komentoi edhe protestën e dhunshme që vijoi deri pas mesnate.
Sipas Besës, protestuesit po luftojnë për diçka tek e cila nuk kanë pjesë, siç janë karriget e qeveritarëve.
Besa i quajti politikanët “rrënjëdalë që rrojnë me gjakun” e shqiptarëve.
“Më dhimbsen njerëzit e thjeshtë, më dhimbsen policët e shkretë!”, shkruajti Besa, “Shqiptarët e thjeshtë që luftojnë njëri- tjetrin për karriget e ca rrënjëdalëve që rrojnë me gjakun e tyre!”
Nuk është hera e parë që këngëtarja komenton publikisht mbi aktualitetin politik apo social në vend.
Në lidhje me efektiven Ina Nuka e cila humbi dy gishta gjatë protestës së banorëve të unazës së re në nëntor, Besa iu kundërpërgjigj publikisht kryebashkiakut Erion Veliaj, për shkak se ai bëri shaka duke thënë se pa gishta, ajo nuk do të gjente burrë.
“Nëse zotëria juaj mendon se disa gishta do e penguakan të gjejë burrë, imagjinoni se ç’mendoni ju për njerëzit me kufizime nga më të ndryshmet! Femra nuk është një barbie lodër që iu prish gishti e s’bën më! Turp”, shkruajti Besa në një postim publik.
