Vetëflijimi duket se së fundmi është një hap më i shpejt për të tërhequr vëmendjen e politikës shqiptare. Vetëm ditën e sotme 35-vjeçari Saimir Zalli kërkoi që të bënte shtetin shqiptar ta dëgjonte hallin e tij për të parë fëmijët dhe për këtë i vuri flakën vetes.
Por rastet e vetëflijimit në historinë e kronikës së vendit tonë nuk janë të pakta.
Ish-të përndjekurit politikë
Ndërsa kthehemi 5 vite më parë, një nga ngjarjet më të bujshme mbetet ajo e tetorit të 2012-s. Ish-të burgosurit politikë ishin ngujuar prej 17 ditësh në atë kohë në një grevë urie, e cila si qëllim kishte dhënin e dëmshpërbliemeve nga ana e qeverisë.
Ish-të burgosurit politikë kërkonin nga qeveria të plotësonte kërkesat e tyre për dëmshpërblim për vitet e burgut që kanë kryer në vitet e diktaturës për shkak të politikës së atëhershme.
Ngjarja më e rënde dhe më e dhimbshme e një greve shënoi mëngjesin e 8 tetorit të 2015-s, që pavarësisht interesit dhe solidaritetit të mjaft komponentëve të shoqërisë ndeshi në heshtjen e qeverisë.
Gjergj Ndreca ndërmori aktin e vetëflijimit duke u përpjekur të digjej përpara tendës ku prej 17 ditësh zhvillohej greva e urisë. Sapo u zgjua në mëngjes, teksa të gjithë grevistët e tjerë ishin duke qëndruar në tendë dhe po lexonin shtypin e ditës, Ndreca u veçua nga të tjerët, u lye me benzinë dhe tentoi t’i vinte flakën vetes.
Por nuk mbaroi me kaq! Vetëm dy ditë pas ngjarjes së rëndë, më 10 tetor grevisti Lirak Beko mori të njëjtin vendim. Sipas shpjegimeve të marra në atë kohë nga dëshmitarët okularë, Beko doli nga çadra e kampit dhe spërkati veten me benzinë dhe më pas ndezi një shkrepëse në pjesën e pantallonave.
Kjo ngjarje ka mbetur ende në mendjen tonë, pasi ish-i përndjekuri politik gjeti vdekjen vetëm pak ditë më pas. Lirak Bejko ndërroi jetë më 2 nëntor në ambientet e spitalit të Barit në Itali, ku ishte dërguar për mjekim.
Ngjarja tragjike, e cila mund të shënonte të tretin rast të vetëdjegieve nga shtresa e ish të përndjekurve pas atij të grevistëve Gjergj Ndrecës (3 ditë më parë) e Lirak Bejkos (një ditë më parë), u parandalua nga policia. Forca të shumta policie parandaluan aktin e vetëflijimit gjatë momentin që ish-i burgosuri Gani Alia po lyente trupin e tij me benzinë, më 11 tetor të 2012-s.
Pavarësisht ngjarjes së rëndë, rreth dy vite më pas më 24 prill të 2014-s një tjetër ish-i përndjekur politik tentoi të vetëdigjej. Vendndodhja ishte përpara selisë së Kuvendit. Ndërhyrja e menjëhershme e forcave të rendit shmangu aktin e ndërmarrë nga Kujtim Kaziu, i cili kishte me vete një shishe me lëndë djegëse.
Aktin e vetëflijimit, Kaziu tentoi ta kryente pasi disa ish-të përndjekur politikë mbajtën një deklaratë ku i kërkonin qeverisë që të dëmshpërblente të gjithë ata ish-të dënuar politikë që janë gjallë.
Benzina është parë në disa raste zgjidhja më e lehtë për të kërkuar ndihmë, vëmendje apo zgjidhje.
Vetëflijimi për pronën
Prona është bërë “molla e sherrit” dhe arsyeja që qytetarët jo vetëm i kanë shkaktuar keq të tjerëve, por edhe vetes. Në qershor të 2016-s një shtetas me inicialet P. Xh., kërcënoi se do të vetëdigjej me lëndë djegëse. Policia ndërhyri në kohë, ndërsa u mësua se qytetari e kishte marrë këtë vendim për arsye të një konflikti midis tij dhe një kompanie ndërtimi, të cilën e kishte kontraktuar për ndërtimin e një pallati në pronën që ai posedonte.
Një tjetër rast është ai i 14 qershorit të këtij viti, kur 59-vjeçari Andon Shkodra tentoi të vriste veten për herë të tretë brenda 10 ditësh, dy prej të cilave ndodhën brenda 48 orësh. Shkak u një vendim i gjykatës të shkallës së parë, për largimin e tij nga banesa. Ai hyri në gjykatë dhe leu veten me benzinë, ndalimi i tij para se të vendoste flakën u bë në kohë.
Sadije Hysa, 49 vjeç, tentoi të vetëdigjej para Gjykatës së Shkallës së Parë në Gjirokastër. “Më kanë djegur shtëpinë, më kanë marrë dokumentet, ndaj familjes sime janë bërë padrejtësi”, thoshte gruaja para se të ndalohej.
Dashuria për fëmijët
Saimir Zalli nuk është prindi i vetëm se dëshmoi që për fëmijën sakrifikon gjithçka, edhe jetën. Më 19 janar të 2017-s Marko Sillo, 57 vjeç, i vuri flakën vetes në Policinë e Fierit pasi i ishte zhdukur vajza prej 3 vitesh. Që në 2016-s kishte bërë një denoncim se në vitin 2014 iu largua vajza nga banesa dhe dyshonte se mund të shfrytëzohej për prostitucion jashtë shtetit.
Vendet e vetëflijimit: Piramida dhe Kuvendi
Ngjarja e të moshuarit Qazim Gapi në prill të 2016-s bëri shumë bujë. Ai u ngjit në majën e Piramidës, u zhvesh dhe u spërkat me benzinë. Por forcat e policisë, ndërhynë menjëherë duke ndaluar ngjarjen që mund të kishte përfunduar në tragjedi.
Ndërsa në 24 nëntor të 2016-s, tranvestiti i njohur me emrin “Anxhela”, tentoi që të vetëdigjej përpara selisë së Parlamentit. Shtetasi me iniciale F.H, leu veten me benzinë me anë të një shishe plastike dhe më pas ka tentoi të vetëdigjej me anë të një çakmaku.
