Këngëtarja me famë botërore Bebe Rexha herë pas here është ndjerë e ofenduar nga shqiptarët dhe ditën e sotme ka vendosur që të reagojë përmes disa videove në Insta Story.
Ylli i muzikës botërore me origjinë shqiptare ka pohuar se komentet më të ndyra në postimet në llogarinë e saj në Instagram rezultojnë të jenë nga shqiptarët.
Tepër e ofenduar dhe e indinjuar, Bebe shpërndan një mesazh sensibilizimi në mënyrë që shqiptarët të reflektojnë, të përkrahin dhe të ndihen krenarë për njëri-tjetrin.
Ja si është shprehur ajo: “Unë e dua kulturën e vendit tim, u rrita si shqiptare dhe vërtet e dua, por ndonjëherë ndjej se shqiptarët nuk e ndihmojnë njëri-tjetrin. Në Instagram-in tim komentet më të ndyra rezultojnë të jenë gjithnjë nga shqiptarët. Kjo më bën shumë konfuze sepse… a nuk supozohet që ne t’i japim një dorë, të ngremë dhe të mbështesim njëri-tjetrin? Mendoj se duhet të tregojmë më shumë dashuri, të mbështesim njëri-tjetrin dhe të jemi krenarë. Nuk mund të them se të gjithë nuk ma shprehin mbështetjen e tyre sepse ka persona, fansa të mitë shqiptarë që më thonë që ndihen krenarë për mua, por thjesht është e vështirë që të shohësh se vetë njerëzit e tu të thonë gjëra jo të hijshme për ty. Unë jam personi numër një që përkrah njerëz nga vend im… Megjithatë shoh që ka persona që më mbështesin dhe përkrahin, kështu që, faleminderit.”
Rikujtojmë se pak javë më parë Bebe pranoi publikisht se vuan nga çrregullimi bipolar (është një sëmundje e rëndë mendore që konsiston në luhatje të papritura të humorit).
“Për një kohë super të gjatë unë nuk e kuptoja se përse ndihesha aq e sëmurë. Përse ndjeja pafuqi që më bënin që të mos dëshiroja të dilja nga shtëpia ose të rrethohesha nga njerëz dhe përse ndjeja super energji që nuk më lejonin që të flija gjumë, që nuk më lejonin të ndaloja së punuari ose të bëri muzikë. Tani e di pse! Unë jam bipolare dhe s’kam më turp ta them! Kjo është e gjitha. Ky album i radhës do të jetë albumi më i preferuar sepse unë nuk do fsheh asgjë. Ju dua të gjithëve shumë dhe shpresoj që të më pranoni mua siç jam. Nuk dua që juve t’ju vijë keq. Thjesht dua të më pranoni. Kjo është e gjitha. Ju dua”, shkruante këngëtarja asokohe.
