Bashkimi Europian ka akorduar 4 milion euro në fushën e shëndetësisë shqiptare në luftën kundër COVID-19.
Lajmi u dha sot prmes zyrës së Kombeve të Bashkuara në Shqipëri, në një mbledhje online mes, ministres së Shëndetësisë Ogerta Manastirliu, Ambasadorit të BE në Shqipëri z. Luigi Soreca dhe Koordinatorit të OKB në Shqipëri z. Brian Williams.
“Kjo ndihmë për Shqipërinë është një reagim i shpejtë për të luftuar një armik të përbashkët si Covid-19,” u shpreh Ministrja e Shëndetësisë dhe Mbrojtjes Socale, Ogerta Manastirliu gjatë komunikimit online.
“Përmes kësaj mbështetje, ne do të jemi në gjendje të mobilizojmë më shumë burime në luftën kundër COVID-19, në mbështetje të sistemit shëndetësor jo vetëm për sot, por edhe për nesër. Kjo ndihmë e menjëhershme duke mbështetur furnizimin e pajisjeve mjekësore, të tilla si ventilatorët mjekësorë, pajisjet e ICU, laboratorët, ambulancat automatike dhe mjetet e mbrojtjes së disponueshme për stafin e kujdesit shëndetësor, do të rrisë kapacitetet tona për të përmirësuar diagnozën dhe trajtimin e COVID-19”, vijoi Manastirliu.
Marrëveshja u firmos live në mbledhjen e zhvilluar online, pasi ministrja shqiptare paraqiti situatën përmbledhëse nga koronavirusi në vend. Manastirliu foli për rritjet e kapaciteteve të sistemit shëndetësor në vendin tonë, për të luftuar koronavirusin.
Shpresojmë që tani, pas lëvrimit të këtij fondi, të ketë më tepër të dhëna të sakta lidhur me numrin e ventilatorëve të siguruar nga Ministria e Shëndetësisë, për të cilët iconstyle.al ka këmbëngulur prej fillimit (lexo këtu).
/Iconstyle.al
