Pak ditë pasi Bashkimi Evropian e vendosi Serbinë në listën e vendeve të sigurta, dhe u hapi dyert qytetarëve të saj, shteti i Ballkanit Perëndimor ka kthyer gjendjen e emergjencës në Beograd.
Serbia dhe Mali i Zi ishin ndër të vetmet shtete nga Ballkani Perëndimor, qytetarët e të cilave mund të udhëtonin lirisht në vendet evropiane, në një kohë që Shqipëria, Maqedonia e Veriut dhe Kosova i kanë dyert e mbyllura.
https://www.instagram.com/p/CCGcDFxgeHK/
Sipas mediave serbe, rregullat e reja të miratuara së fundi parashikojnë kufizimin e orarit të ambienteve hotelierike dhe klubeve të natës në Beograd, pa përjashtim, në periudhën nga 23:00 deri në 6:00 të mëngjesit.
Në të gjitha hapësirat e mbyllura, pa përjashtim, është e detyrueshme të veshësh maska mbrojtëse, duke respektuar distancën fizike prej 1.5 metrash. Gjithashtu, është e detyrueshme maska mbrojtëse në transportin publik urban dhe periferik dhe në transportin ndërkufitar.
Nëse nuk respektohen këto masa për mbajtjen e detyrueshme të maskës, atëherë qytetarët mund të gjobiten deri në 5,000 dinarë që i bie diku te 80 euro.
Qeveria gjithashtu ka vendosur të ndalojë tubimet në vendet publike e në ambiente të mbyllura për më shumë se 100 njerëz, dhe në ato hapësira të hapura për më shumë se 500 njerëz.
Gjatë çdo tubimi brenda ose jashtë, është e nevojshme të respektohet një distancë fizike prej 1.5 metrash. Masat e miratuara do të jenë të vlefshme deri më 18 korrik.
/b92.net
