Një 4-vjeçar humbi jetën sot në qytetin e Beratit pasi ra në kontakt me rrymën elektrike në një nga parqet e qytetit.
Ngjarja tragjike u përfol se ndodhi pas neglizhencës së punonjësve të bashkisë që kishin lënë telat e korentit të zhveshur.
Menjëherë pasi vogëlushi ndërroi jetë, bashkia reagoi duke bërë me dije se ka nisur një inspektim të sinjalistikës rrugore dhe linjave të ndriçimit publik në qytet.
Ajo shprehet se është e hapur që të bashkëpunojë me institucionet për zbardhjen e plotë të ngjarjes, ndërsa ka shprehur ngushëllime familjes për humbjen tragjike.
Reagimi i bashkisë:
Bashkia Berat është njoftuar për humbjen tragjike të jetës së vogëlushit Aleksandër Brahimasi.
Ka nisur një inspektim të hollësishëm të sinjalistikës rrugore dhe linjat e ndriçimit publik në qytet.
Bashkia Berat është e hapur për bashkëpunim me institucionet përkatëse për zbardhjen e plotë të ngjarjes tepër të rëndë.
Bashkia Berat garanton bashkëqytetasit se siguria e jetës së qytetarëve është detyra jonë parësore dhe nuk do të tolerohet asnjë neglizhim.
Ngushëllimet më të sinqerta familjes, për humbjen tragjike të jetës së të dashurit të tyre!
