Aktori dhe muzikani i njohur Cody Longo është gjetur i pajetë në shtëpinë e tij në Austin, Teksas nga Policia, pasi bashkëshortja e tij, Stephanie, telefonoi ndihmën e shpejtë që të kontrollonin 34-vjeçarin sepse kishte një parandjenjë të keqe. Sipas raportimeve, shqetësimi i saj kishte ardhur pasi nuk po mundte të komunikonte me Cody-n, duke marrë parasysh edhe historinë e tij me varësinë nga alkooli.
Pas telefonatës së Stephanie, policët shkuan në shtëpinë e çiftit, hapën derën dhe e gjetën të vdekur në shtrat aktorin. Zyrtarisht ende nuk dihet shkaku i vdekjes, megjithatë sipas familjes së tij, prej vitesh Longo ka pasur probleme me abuzimin me alkoolin dhe pikërisht kjo mund të ketë qenë shkak për largimin e tij të parakohshëm nga jeta.
Artisti prej kohësh qëndronte i shkëputur nga vëmendja e publikut, teksa suksesin e tij më të madh e arriti në vitin 2014 si autor dhe këngëtar i “She Said”, por edhe për punën e tij si aktor në serialet “Days of Our Lives”, “Brothers & Sisters” apo “CSI: Crime Scene Investigation”.
Longo lë pas 3 fëmijë dhe bashkëshorten e tij, e cila ka bërë një reagim të shkurtër pas vdekjes së Cody-t: “Ishte një baba i përkushtuar dhe bashkëshort i mirë. E gjithë bota jonë u shkatërrua”.
