Mbyllja e Muzeut Historik Kombëtar ishte padyshim një nga lajmet që erdhi i papritur për qytetarët dhe në veçanti për ata që e duan artin dhe kërkojnë ta ruajnë me fanatizëm historinë e vendit tonë ndër shekuj.
Njoftimi erdhi vetëm nga një postim në rrjete sociale që bënte me dije se Muzeu do të mbyllte dyert për vizitorët dhe turistët deri më 15 mars 2028. 4 vite kohë për punimet do të ishin mjaftueshëm për ta rindërtuar nga e para e jo më për ta rregulluar.
Megjithatë Muzeu i dha sinjalet e para të dyshimit që në momentin që fshiu njoftimin. Çfarë po gatuhet në prapaskenë për këtë projekt i cili për 4 vite do të mbajë larg turistët që shfaqin interes të dinë më shumë për historinë e vendit tonë?
Projekti parashikon një hapësirë të tërë me bare dhe kafene ku do të haet dhe pihet, duke lënë në hije atë për të cilën vetë godina mban emrin “Muzeu Historik Kombëtar”.
Projekti për restaurimin dhe rimodelimin e Muzeut u prezantua në dhjetor të vitit të kaluar dhe plani është hartuar nga studioja arkitekturore “Csanova+Hernandez architects”, kliente e qeverisë.
Siç shohim edhe në plan, sheshi i Muzeut nuk do të jetë më i njëjti pasi do të ketë një ndërhyrje rrënjësore. Po ashtu do parashikohet të ketë dhe një kat nëntokësor e sheshuar me kafene dhe bare.
“Programi i ri publik përbëhet nga një kafe-restorant, një bibliotekë, një bar-kafe dhe një hapësirë multifunksionale dhe disa dhoma edukative të vendosura në një bodrum të ri të vendosur nën oborr”, theksohet në projekt.
Sipas planit, salla e ekspozitës zgjerohet në hapësirën publike të jashtme. Restoranti vendoset në tarracë, salla e historisë zgjerohet me një sallë pritjeje historie në natyrë.
Bar-kafeja zgjerohet në tarracë, e vendosur te pjesa përpara Muzeut. Biblioteka dhe hapësira shumëfunksionale zgjerohet me një auditor të jashtëm. Dhomat edukative zgjerohen me një hapësirë edukative të jashtme në oborr.
