Babai i Lindita Musait, i cili qëlloi për vdekje vajzën e tij, dhëndrin Veton Musai dhe më pas veten, është jashtë rrezikut për jetën.
Ngjarja ndodhi mbrëmjen e Vitit të Ri në Australi, pas një konflikti që dyshohet se lidhet me dëshirën e Linditës për të filluar jetesën larg babait të saj.
Osman Shaptafaj, 55 vjeç, ishte ndarë nga gruaja rreth 8 vite më parë dhe jetonte vetëm 5 km larg çiftit të sapomartuar Lindita dhe Veton Musait.
“Daily Mail” shkruan se Shaptafaj, i cili është i shtruar në spitalin Alfred në Melburn, do të mbijetojë nga plagët në kokë, dhe më pas do të përballet me akuzat për vrasje.
“Kjo nuk kishte të bënte me të shkuarën ose me besimin e tij, pasi ai nuk beson”, tha një i afërm për babanë e Linditës, të cilin e përshkruan si një njeri me formim të vështirë.
I afërmi tha se nëna e Linditës kishte bërë më të mirën për të jetuar në një familje të pakënaqur, por gjeti guximin të largohej pas një sulmi në spital.
Vajza gjithashtu kishte marrë guximin për të filluar një jetë paqësore me burrin e saj larg të atit, por nuk ia doli.
Lindita dhe Vetoni kishin vetëm një vit që ishin martuar dhe quheshin “çifti perket”.
25-vjeçarja humbi jetën në vend nga plumbat, ndërsa dhëndri disa orë më vonë në spital, pasi plagët ishin të rënda. Ndërkohë që autori i ngjarjes makabre tentoi vetëvrasjen duke qëlluar veten në kokë por me sa duket do të mbijetojë për të jetuar me turp për krimin makabër.
