Historia e të kaluarës së këngëtarit Ermal Meta, u përfol shumë nga mediat shqiptare, pasi mori kupën në “Sanremo”, bashkë me Fabrizio Moro-n. Ajo që nxiti më shumë shkrimet ishte fjalia, me të cilën u përpoq të shprehte ndjesinë e tij në lidhje me mesazhin e fortë që kënga përcillte:
“Kur e këndova për herë të parë këtë refren, më kaloi fëmijëria para syve. Më vinte ta këndoja: “Bastard, nuk më ke bërë asgjë”.
Më pas 36-vjeçari me origjinë nga Fieri, u kërkoi përmes një statusi, mediave, që të mos spekulonin për të fjalët që kishte thënë.
Nëna e artistit shqiptar, Mira Borova, pranoi të fliste për emisionin “Jo vetëm modë” për situatën në të cilën gjendej i biri dhe familja e saj pas fitores, duke mbështetur deklaratën e tij.
“Gazetat Shqiptare të mbajnë një përgjegjësi të madhe për fantazitë që përdorin dhe ne jemi shumë të prekur nga kjo gjë, në vend të jemi të lumtur. Edhe i ati i Ermalit do gëzonte ndryshe, po të mos shkruheshin të gjitha budallallëqet që janë shkruar.
Duhet të mendoni që, sot që Ermali është 36 vjeç, domethënë burrë, ai s’ka nevojë të flasë për gjëra të tilla. Keni futur në zjarr dhe keni ngritur mure midis dy familjeve normale, që bëjnë një jetë tepër normale. Fati e donte të ndaheshim dhe çdo njëri nga ne ka familjen e tij. Mendoni se sa të lënduar janë fëmijët e tij sot, që nuk hynë fare në këtë çështje, që ne nuk kemi ftuar njeri të na e zgjidhë.
Jam shumë e indinjuar nga gazetarët shqiptarë pasi një fitore e tillë, që nuk është vetëm e Ermalit, është kthyer në polemikë për babanë e dhunshëm. Gjërat para se të thuhen duhet të mendohen mirë dhe të jenë të përgjegjshme. Ermali nuk ka folur asnjëherë për dhunë, pasi e para nuk flet për gjëra personale, e dyta nuk flet për persona që nuk janë prezentë. Edukata e tij nuk ia lejon dhe ju, ma merr mendja, e keni konstatuar këtë.”
Një vit më parë, po në ‘Sanremo”, Ermal Meta këndonte “Është e ndaluar të vdesësh”, (“Vietato morire”). Atë kohë, nëpër intervista Ermali rrëfente për kujtime aspak të lumtura. Në një intervistë për revistën “TV sorrizi e canzoni” e marsit të vjetshëm, Ermal Meta rrëfeu një të vërtetë tjetër për publikun italian:
“Kur më pyesnin në intervista se si ishte fëmijëria ime, iu përgjigjesha thjesht; ‘E bukur’. Por e vërteta është se shumë gjëra që i takojnë atyre viteve, i mbaj brenda, por i kujtoj nga shenjat që kam ende në trup. Kënga ime “Vietato morire”, ka në brendësi të saj një histori personale, (teksti tregon rebelimin e një djali të abuzuar nga babai)”.
