Autoriteti i Konkurrencës (AK) i rekomandon Autoritetit të Komunikimeve Elektronike dhe Postare (AKEP) vendosjen në rregullim të tregut me pakicë të telefonisë celulare në vend.
Autoriteti i Konkurrencës vlerëson se, në kushtet e ndryshimeve strukturore të ndodhura në tregun e telefonisë celulare, AKEP duhet të realizojë analizën e tregut të pakicës të tregut të telefonisë celulare për të ndërmarrë masat e nevojshme rregullatore për rregullimin e këtij tregu.
Autoriteti i Konkurrencës i kërkon AKEP-it që të rregullojë tregun e telefonisë celulare duke caktuar çmimet.
Sipas njoftimit zyrtar të AK, rekomandimet ishin pjesën e vendimit të Komisionit të Konkurrencës nr.1048, datë 16.01.2023 “Për dhënien e disa rekomandime Autoritetit të Komunikimeve Elektronike dhe Postare në tregun e shërbimeve celulare lidhur me dokumentin nxjerrjen për këshillim publik të dokumentit “Analizë e tregjeve me shumicë të terminimit të thirrjeve në rrjetet e telefonisë së lëvizshme (celulare)”.
Që prej fillimit të vitit të kaluar, tregu i telefonisë celulare në vend ka vetëm dy operatorë, pas bashkimit me përthithje mes operatorëve One Telecommunications dhe Albtelecom, që erdhi si rezultat i blerjes së dy kompanive nga grupi hungarez 4iG.
Që nga vera e vitit të kaluar miliona abonentë të ONE janë përballur me përkeqësim të ndjeshëm të shërbimit deri edhe në ndërprerje totale, ndërkohë që shumë qytetarë ankohen edhe për tarifa të rritura.
