Operatorët e telefonisë celulare shpesherë kanë shtrenjtuar çmimet e paketave, duke ngjallur goxha pakënaqësi në radhët e qytetarëve. “iconstyle.al” prej kohësh po ndjek me shqetësim këtë çështje, që ka goxha ndikim tek qytetarët shqiptarë, të cilët kanë rënë ‘pre’ e abuzimeve të njëpasnjëshme, një pjesë të të cilave i kemi trajtuar e një pjesë tjetër do i ndjekim në vijim.
Në gjithë këtë vorbull shkeljesh dhe abuzimesh, e gjithë përgjegjësia, përveçse tek vetë kompanitë ka rënë tek Autoritet i Konkurrrencës dhe Autoriteti i Komunikimeve Elektronike dhe Postare që në vazhdimësi kanë qëndruar dhe qëndrojnë në heshtje, përballë kësaj çështjeje.
Shqetësimi i radhës për qytetarët është fakti që operatori Vodafone njoftoi ditën e hënë se duke filluar nga data 28 maj do të rrisë me 100 Lekë në muaj të gjitha tarifat e planeve për klientët e segmentit konsumator, për shërbimet fikse me kontrata standarde 12 dhe 24 mujore.
Sipas Vodafone, ky ndryshim vjen si rezultat i ndryshimit të normave të inflacionit rezultat i krizave në sektorë të ndryshëm të ekonomisë si karburantet, energjia, etj, me impakt direkt në kostot dhe marzhet e biznesit në telekomunikacion.
Sipas “Monitor”, Vodafone sjell si referencë ligjore dispozitat e ligjit 9918/2008, i ndryshuar dhe Rregullores “Për Mbrojtjen e Konsumatorit”, duke shtuar se ka marrë të gjitha masat për njoftim individual dhe nëpërmjet mjeteve të komunikimit masiv për t’ua komunikuar këtë klientëve të impaktuar nga ky ndryshim që të rivlerësojnë kontratën e tyre dhe t’u bëhet me dije mundësia për t’u shkëputuar nga kontratat pa penalitet, në rast se nuk janë dakord me rritjen e tarifës.
Por, në këtë referencë ligjore nuk parashikohet në asnjë rast e drejta e operatorit për të aplikuar ndryshime të njënashme të tarifave në kontratat me afat të caktuar. Kjo e drejtë njihet vetëm për kontratat me afat të pacaktuar dhe me një afat njoftimi 30 ditor.
“Pajtimtari gëzon të drejtën për ta zgjidhur kontratën me afat të pacaktuar, në çdo kohë, me një
njoftim 30 ditor kundrejt sipërmarrësit, sipas parashikimeve të legjislacionit në fuqi që rregullon regjimin e të drejtave dhe detyrimeve në RSH. Edhe sipërmarrësi gëzon të drejtën për t’u tërhequr nga kontrata me afat të pacaktuar me një njoftim 30 ditor kundrejt pajtimtarit.
Nëse pajtimtari nuk i pranon kushtet e reja të njoftuara nga sipërmarrësit e rrjeteve dhe shërbimeve të komunikimeve elektronike sipas procedurës dhe afateve të vendosura në këtë rregullore, ai ka të drejtë për t’u tërhequr nga kontrata pa penalitet,” shkruhet në nenin 17 të rregullores.
Për kontratat me afat të caktuar, 12 dhe 24 mujore, asnjëra nga palët nuk të drejtë të tërhiqet apo të ndryshojë kushtet e përcaktuara pa penalitet. Për klientët, këto kontrata përmbajnë një penalitet tërheqje, duke shkaktuar sigurisht pakënaqësi tek qytetarët.
Vodafone i njeh vetes të drejtën për të aplikuar ndryshime të njëanshme të tarifave, pavarësisht se ka lidhur një kontratë ku çmimet e vendosura janë të detyrueshme për t’u zbatuar deri në përfundim të afatit të saj.
