Austria ka njoftuar se do të vazhdojë me planet për të organizuar Eurovision 2026 në Vjenë, pavarësisht tensioneve që kanë lindur pas vendimit për të lejuar pjesëmarrjen e Izraelit. Katër transmetues kombëtarë – nga Spanja, Irlanda, Sllovenia dhe Holanda – kanë njoftuar se do të bojkotojnë ngjarjen, duke mos transmetuar gjysmëfinalet dhe finalen, dhe pa dërguar pjesëmarrësit e tyre.
Ky vendim erdhi pas një mbledhjeje të European Broadcasting Union (EBU) në Gjenevë, ku u miratua pjesëmarrja e Izraelit në edicionin e 70-të të festivalit. Megjithatë, Austria mbetet e vendosur që të vijojë sipas planit, sipas ORF, transmetuesi kombëtar austriak. Drejtori i përgjithshëm, Roland Weissmann, tha se mungesa e disa vendeve mund të ndikojë financiarisht, por nuk do të dëmtojë organizimin e shfaqjes.
Austria dhe Gjermania ishin ndër vendet më të forta në mbështetje të Izraelit, ndërsa ministri i jashtëm gjerman, Johann Wadephul, theksoi se kultura duhet të lidhë njerëzit, jo të shërbejë si instrument politik.
Në mesin e vendeve që bojkotojnë, Holanda ka qenë pjesëmarrëse që nga edicioni i parë i Eurovisionit në 1956, ndërsa Irlanda ndan rekordin për më shumë fitore, me shtatë çmime. Kryeministri irlandez, Micheál Martin, e quajti vendimin një “akt solidariteti”.
Për momentin, vendet e tjera, përfshirë Suedinë, kanë konfirmuar pjesëmarrjen e tyre. EBU njoftoi se masat e sigurisë do të jenë të shtuar dhe se festivali do të zhvillohet sipas planit, duke ruajtur traditën e ngjarjes më të madhe të muzikës live në botë.
