Lidhja e tyre nisi në moshë të re, ndërsa kërkesa për divorc nga bashkëshorti i saj erdhi si e papritur vitin e kaluar, pas 10 vitesh martesë. Aurela Hoxha, emri i vërtetë i së cilës është Eurela, rrëfeu në emisionin “Zonë e Lirë”, se ish-bashkëshorti i saj Admir Ismajlukaj ishte mashkulli i parë në jetën e saj.
“U lidha që 16 vjeçe dhe ai ishte mashkulli i parë në jetën time, deri në momentin e ndarjes”, u shpreh Hoxha.
Ajo që na çuditi më shumë është deklarata e saj, se martesa me të ishte për çështje dokumentesh.
Hoxha rrëfeu se ajo dhe Ismajlukaj u martuan në vitin 2005 për shkak se familjarët e saj ndodheshin në SHBA dhe ajo dëshironte gjithashtu të shkonte atje.
E pyetur në lidhje me këtë marrëdhënie të gjatë të nisur në moshë të vogël, Hoxha u shpreh se e vuante faktin që nuk kishte pasur më shumë eksperienca. “Shumë gjëra i kam mësuar tani. Për shumë situata tani nuk jam e përgatitur”, tha ajo.
Por nëse kthehemi në shatorin e vitit të kaluar, kujtojmë edhe kërkesën për padi të ish-bashkëshortit të saj.
“Fillimisht marrëdhëniet tona martesore kanë qenë të mira dhe janë karakterizuar nga dashuria, mirëkuptimi reciprok dhe harmonia familjare. Kohët e fundit marrëdhëniet tona familjare janë përkeqësuar për shkak të qëndrimeve jo korrekte të palës të së paditurës ndaj meje. I ndodhur në rrethanat, ku marrëdhëniet tona janë dëmtuar rëndë nga ana morale prej të paditurës kanë sjellë si pasojë mungesën e harmonisë, mirëkuptimit dhe respektit tim ndaj Aurelës. Ka vend të theksohet se marrëdhëniet në vazhdimësi nuk janë përmirësuar, por përkundrazi janë dëmtuar, duke ndërprerë dhe bashkëjetesën tonë, dhe si rrjedhojë kemi më tepër se katër muaj që jetojmë të veçuar. Martesa jonë e ka humbur qëllimin e ndaj dhe bashkëjetesa jonë është bërë e pamundur”, shkruhej në padinë për divorc të lëshuar në shtator të 2015-s.
Si shkak për ndarjen Admiri akuzon prishjen e moralit nga Aurela, por të vërtetën se çfarë ka bërë kjo e fundit e dinë vetëm ata të dy.
