Shkodra është tronditur mbrëmjen e së enjtes nga një vrasje me armë zjarri e ndodhur në qendër të qytetit. Ngjarja ndodhi rreth orës 22:30, në lagjen “Vasil Shanto”, ku viktimë mbeti Kristian Kola, 34 vjeç. Ai u qëllua me armë zjarri teksa ndodhej në ambientet e jashtme të një lokali.
Sipas të dhënave paraprake, autorët dyshohet të jenë dy persona të veshur me të zeza, që lëviznin me një motomjet. Pas krimit, ata janë larguar me shpejtësi, ndërsa ende nuk dihen motivet e atentatit.
Policia e Shkodrës konfirmoi ngjarjen përmes një reagimi zyrtar, duke theksuar se menjëherë pas njoftimit shërbimet policore shkuan në vendin e ngjarjes, ngritën pika kontrolli në hyrje dhe dalje të qytetit, si dhe po vijojnë kontrollet në zona të ndryshme për identifikimin dhe kapjen e autorëve.
Ndërkohë, është ngritur një grup i posaçëm hetimor nën drejtimin e Prokurorisë, i cili po punon për të sqaruar rrethanat e plota të ngjarjes dhe për të dokumentuar ligjërisht provat.
Vrasja e Kristian Kolës ka rikthyer shqetësimin për sigurinë në Shkodër, ku edhe më herët janë shënuar atentate të ngjashme. Banorët e zonës u shprehën të tronditur nga ngjarja, duke theksuar se akti ndodhi në një orar kur qyteti është ende i gjallë me lëvizje njerëzish.
Hetimet pritet të hedhin dritë mbi motivet dhe rrethinat e këtij atentati që ka gjunjëzuar sërish qytetin verior.
