Lorena Bërdufi sapo kishte nisur ëndrrat për të ndërtuar jetën e saj, por fati kishte rezervuar një fund të dhimbshëm, mes peripecive dhe sfidave që gjimnazistja nga Kavaja kaloi në jetë.
Mes dhimbjes dhe lotësh, familjarët dhe miqtë i dhanë lamtumirën e fundit pak ditë më parë, ish Miss-it që synonte të fitonte kurorën e më të bukurës në vendlindje, për t’i bërë prindërit krenarë.
Një goditje në zemër i mori jetën, ndërsa po i gëzohej fejesës që kishte kurorëzuar së fundmi me djalin që donte.
Lorena nuk e kishte mbyllur ende plagën që i kishte hapur vdekja e parakohshme e motrës më të vogël por jeta po i buzëqeshte, deri mëngjesin e 25 janarit kur zemra e saj pësoi goditjen fatale, duke hapur një plagë të re në familjen Bërdufi.
Tragjedia e dyfishtë në familjen që rriti dy vajza me mund e me shpirt për t’ju plotësuar ëndrrat, nuk e shuajti dritën e shpresës në zemrën e Lorenës.
Ish Miss-i pas mësimit punonte në një market për të ndihmuar familjen, teksa përpiqej të ndiqte dhe këshillat e mjekëve. Ata shpesh e këshillonin të mos u nënshtrohej emocioneve të forta, por jeta është e mbushur me to.
Ndonëse në vështirësi ekonomike, prindërit kishin bërë të pamundurën për të trajtuar vajzat e tyre duke i dërguar edhe jashtë vendit për t’u konsultuar me mjekë. Por, në më pak se tre vjet familja Bërdufi u godit nga dy fatkeqësi.
Ëndrrat e Lorenës u prenë në mes papritur, duke lënë pas një histori të trishtë.
