Një vit më parë abonentët e Abcom do të kalonin te Vodafone pasi ky i fundit vendosi të mbajë brandin e tij dhe të zëvendësojë atë të Abcom në të gjitha pikat e shitjes dhe materialet publicitare. Nënshkrimi i marrëveshjes mes Vodafone dhe ABCom nisi në fund të vitit 2019. Në atë kohë Vodafone argumentoi se blerja lidhej me zgjerimin e shërbimeve të teknologjisë fikse,TV dhe Internet fiks. Marrëveshja u miratua në datë 7 shkurt 2020 dhe qartazi çdo lëvizje e Vodafone lidhet me forcimin e pozitave në treg, çka i jep përparësi në abuzimin me çmimet pa përmirësuar shërbimet.
E kjo është vërtetuar disa herë. Pafund klientë ankohen për shërbimin aspak cilësor të internetit, që marrin nga “Abcom”, teksa të shumtë janë ata që as nuk kanë mundur ta marrin shërbimin me fibër optike.
Në pikat e shitjes shitësit ofrojnë si alternativë të vetme “zgjidhjeje”, t’u ofrojnë klientëve familjarë që presin internet me fibër optike vetëm opsionin e abonimit si “biznes”. Justifikimi është se kompania e ka të pamundur që të instalojë nëpër pallate dhe zona të ndryshme të kryeqytetit linjat e fibrave optike, dhe në rastin më të volitshëm këshillohen linjat e “dedikuara” që zakonisht u lidhen subjekteve të biznesit, por që kushtojnë më shtrenjtë se paketat për konsumatorin familjar.
Është ironik fakti se nga njëra anë suporti teknik i kompanisë “Abcom” ankohet se nuk ka mundësinë e instalimit të fibrave optike nëpër pallate dhe abonentë familjarë, dhe nga ana tjetër dyqanet e “Vodafone-Albania” sugjerojnë se po pagove si biznes, linja të lidhet menjëherë.
Kjo gjë nuk e bën aspak serioze dhe konkurruese kompaninë që pretendon se është më e madhja e shërbimit celular në vend, por që në sytë e klientëve dhe pajtimtarëve po shfaqet për ditë e më tepër si kompani mashtruese, ose aspak korrekte. Abuzime të shumta ka edhe me fuqinë e Internetit dhe qytetarët ankohen se edhe pse paguajnë një shumë të caktuar për shërbimin nga “Vodafone-Albania” për një kapacitet të caktuar, ai nuk është asnjëherë në masën e duhur.(KLIKO)
Ditë të tëra pa Internet dhe televizor!
Së fundmi, një qytetare ka paraqitur pranë redaksisë së “iconstyle.al” denoncimin e saj sa i përket abuzimit që i është bërë nga ABCom. Ajo ka kryer të gjitha pagesat e nevojshme, mirëpo në fund nuk ka marrë shërbim.
Pasi ka konstatuar këtë gjë është lidhur me operatorët e ABCom, të cilët i kanë bërë me dije se nuk ka kaluar pagesa në sistem, një papërgjegjshmëri nga ana e tyre. E ndonëse në mesazhet e mëposhtme ata i kanë thënë qytetares se deri në kalimin e pagesës në sistem do aktivizojnë shërbimin e Internetit, diçka e tillë nuk ka ndodhur.
Të nesërmen ata lidhen sërish me qytetaren, por sërish hasin në probleme të brendshme që nuk lidhen aspak me klientët, të cilët vuajnë pasoja të tilla si mungesa e shërbimeve. Qytetarja na shkruan se nuk mori asnjë zgjedhjeje problemi nga “shërbimi i klientit” dhe është detyruar të vizitojë vetë pikat e ABCom.
Problemi i saj nuk mori zgjidhjeje as në dyqanin ku ajo kishte bërë pagesën, konkretisht në rrugën “Sami Frashëri”, pasi nga aty e adresuan për në ish-Bllok. Pra, përveç mungesës së shërbimit, sorollatjeve, shërbimit shumë të dobët të klientit, i është dashur edhe një ditë tjetër për të gjetur vendin e duhur ku të adresojë problemi e saj.
Problem ky i shkaktuar totalisht nga papërgjegjshmëria e ABCom. Më në fund, një javë pasi qëndroi pa internet dhe televizor, problemi i saj u zgjidh. Dhe ju me siguri po pyesni veten, a u dëmshpërblye ajo për gjithë abuzimin dhe sorollatjen?
Fatkeqësisht jo! Nëse e njihni sadopak veprimtarinë e Vodafone, apo edhe të dy kompanive të tjera telefonike, nuk habiteni aspak nga ky veprim, sepse klientët nuk dëmshpërblehen asnjëherë për dëmet që u shkaktohen. Jo vetëm që nuk i është kompensuar shuma e parave, por nuk ka marrë as shërbim shtesë për 7 ditët që qëndroi pa Internet dhe televizor.
Fasada e dobët e Vodafone!
Ndër reklamat e shumta të ofruara nga kjo kompani celulare është edhe paketa “GigaFamily”, e cila duket se po shkakton pakënaqësi të shumta te qytetarët. Sikundër kemi raportuar edhe disa muaj më parë, kjo paketë është një tjetër rrugë abuzimi nga “Vodafone”. (KLIKO)
Së pari, të gjithë ata që kanë internet në shtëpitë e tyre me Abcom, duhet të ndryshojnë totalisht paketat që kanë e t’i shndërrojnë ato në “Vodafone Next +”, që do të thotë se duhet të ndryshosh planin tarifor që ke, t’i bindesh udhëzimeve të Vodafone, të cilat në reklamat e tyre janë shumë të paqarta për shumicën e popullatës. Pra, që të përfitosh këtë “mrekulli”, duhet të ndryshoh paketën dhe patjetër të kesh internet “Abcom” në shtëpi.
Mirëpo, në reklamat e kompanisë thuhet “përfito dyfish internet në celular për të gjithë familjen”, me paketën “GigaFamily”. Por, nuk sqarohet në asnjë vend, se sa persona nga familja e përfitojnë në celular, 1,2 apo 5 persona (Në dyqanet Vodafone të thonë që veç dy persana).
Së dyti, kur shkon në dyqanet “Vodafone”, nuk mund ta përfitosh edhe nëse numrat janë në paketat “Next +”. Kjo, pasi siç thonë punonjëset e dyqaneve, të gjithë numrat duhet të jenë në emër të një personi të familjes, emri i të cilit është dhe në kontratën e internetit me “Abcom”. Pra, duhet ndryshuar pronësia e numrave, të kesh gjithë familjen me vete, ndërkohë që nuk e thonë saktësisht edhe sa persona nga familja e përfitojnë.
Autoriteti i Konkurrencës, Autoriteti i Komunikimeve Elektronike dhe Postare, bëjnë sikur, apo nuk shohin?
Ashtu, si shkeljet e mëparshme që i kemi ndjekur prej muajsh, edhe kjo çështje vë në pikëpyetje të madhe rolin e Autoritetit të Konkurrencës, Autoritetit të Komunikimeve Elektronike dhe Postare dhe Komisionerit për Mbrojtjen e Konsumatorit.
Si fillim, duhet që AKEP të bëhet aktiv në mbrojtje të qytetarëve dhe të përgjegjësive që ka si institucion. Si rregullatori i tregjeve të telefonisë në vend, ndonëse ka premtuar shpeshherë se do të marrë masa për uljen e tarifave celulare në vend, objektivat e tij rrallëherë kanë gjetur zbatim deri më tani në vend.
Fatkeqësisht, qytetari shqiptar është i pambrojtur, qoftë nga AKEP, qoftë nga AK.
