Pedagogu dhe Kryetari i Komisionit për Ekonominë dhe Financat në Partinë e Lirisë, Petraq Milo, po udhëtonte me familjen e tij drejt Malit të Zi, kur u përball me dhunë të shëmtuar nga Policia e kufirit, që tentoi ta nxjerrë zvarrë nga makina.
Askush nga personat e pranishëm në vendngjarje nuk ndërhyri për ta ndaluar këtë akt. Madje, masat e shtetit malazez ndaj dhunuesve erdhën të vonuara (vetëm pas publikimit të videos), megjithëse ngjarja kishte ndodhur që më 15 janar.
Prokuroria e Ulqinit u mjaftua me arrestimin e policëve Nikolla Boljeviç dhe Dragan Shqekiç, ndërsa askush nuk u pezullua nga detyra! Madje, as krerët e Policisë malazeze nuk dhanë dorëheqjen pas këtij dështimi të institucionit.
Për ironi, më 27 Shkurt qeveria shqiptare dhe ajo malazeze do të ulen bashkë në një mbledhje spektakli rutinë, për të folur për marrëveshje dhe bashkëpunim, ndërkohë që drejtësia çalon, qytetarët dhunohen në kufi dhe masat janë qesharake!
Duke qenë se asnjëra nga palët shqiptare apo malazeze nuk i kërkoi ndjesë viktimës, ky është një rast i mirë që të paktën Kryetari i Komunës së Ulqinit, Omer Bajraktari t’i bëjë një ftesë takimi dhe t’i kërkojë falje qytetarit shqiptar Petraq Milo, për dhunën e ushtruar prej efektivëve malazezë.
Megjithëse duartrokitëm fort për kryeministrin me origjinë shqiptare të Malit të Zi, Dritan Abazovic dhe shpresuam për një qeverisje të denjë, ai zhgënjeu duke mbështetur dhunën e dy policëve malazezë, “pasi ajo s’kishte ardhur nga hiçi, sepse video kishte dhe prapaskena” dhe gënjeu kur tha se masat ishin marrë që kur kishte ndodhur ngjarja.
Paturpësisht, Abazovic nuk e mori seriozisht situatën dhe e quajti këtë skenë të shëmtuar dhune ndaj qytetarit shqiptar si “skandal i inskenuar” në kohë zgjedhjesh presidenciale në Malin e Zi, që do të mbahen muajin e ardhshëm.
Kjo nuk është hera e parë që Abazovic tregon dyfytyrësi. Ai do të ngelë në memorie edhe si kryeministri që ktheu pozitat e kishës serbe në Malin e Zi, megjithëse kundërshtuar fort nga malazezët. Po ashtu, ai ka mbajtur anën e serbëve në Ballkanin e Hapur, gjë që nuk i shkon përshtat interesave të Malit të Zi.
