Aktori kryesor në serialin ‘Ramo’, Murat Yıldırım, është infektuar me Covid-19. Këtë lajm e ka bërë të ditur vetë përmes një postimi në rrjetet sociale, ku tregon se nuk ka mundur që t’i shpëtojë dot koronavirusit.
Ai ka bërë apel për të patur më shumë kujdes dhe ka treguar se fatmirësisht gjendja e tij shëndetësore është e mirë.
“Pas një viti duke e shmangur atë, covid më kapi dhe mua. Jam në ditën e 5-të dhe ndihem më mirë tashmë. Unë lutem që kjo sëmundje të largohet nga bota. Kujdesuni për veten tuaj”, ka shkruar aktori.
Ndërkohë dhe emra të njohur të kinematografisë turke nuk i kanë shpëtuar infektimit me Covid-19.
Para disa ditësh aktori turk, Tolgahan Sayisman, zbuloi se është prekur nga Covid-19. Përmes një postimi në Instagram ai bëri të ditur se gjendja e tij shëndetësore ishte rënduar dhe për këtë arsye u detyrua të shtrohet në spital.
“Sapo mësova se jam infektuar me Covid-19. Jam trajtuar në shtëpi për pak kohë. Testi i fundit që bëra rezultoi pozitiv. Mutacioni i ri i koronavirusit në fillim mund të mos dalë pozitiv në test. Ne vendosëm që të vazhdojmë trajtimin në spital. Tregoni kujdes”, shkroi Tolgahan.
Pas deklaratës së aktorit të gjithë u shqetësuan për shëndetin e familjarëve të tij, Almeda Abazin dhe të voglin e tyre, Efehan. Kështu, bukuroshja shqiptare ka treguar më herët se ç’po ndodh me ta dhe si është gjendja e Tolgahan. Almeda tha se pas testeve të gjithë anëtarët e familjes kanë rezultuar pozitiv dhe se aktori ka dalë nga spitali e po vazhdon trajtimin në shtëpi.
