“Shqipëria është me fat që ka një vokal si ai i Gentit”.
Me siguri që këtë e ndjejnë dhe thonë miliona shqiptarë që janë krenarë për performancën e Eugent Bushpepës dhe grupit të tij në festivalin Evropian të këngës.
E thënë kjo nga një prej vokaleve më të mira të muzikës shqiptare, Erinda Agolli, merr një kuptim akoma më të madh, që na bën ta themi me zë të lartë se jemi krenarë që kemi talente të tilla në Shqipëri.
Sopranoja shqiptare ka ndarë për “Iconstyle.al”, eksperiencën e saj të parë në skenën e madhe të Eurovizionit para 20 mijë vetëve.
Në një intervistë ekskluzive ajo shprehet se Eurovizioni dëgjoi zërin më të mirë mashkull të këtij viti dhe kjo u tha jo vetëm prej shqiptarëve por edhe prej sondazheve të zhvilluara në kuadër të festivalit.
Por renditjen në vendin e 11-të nuk e meritonim dhe aq më pak vlerësimin me 0 pikë të jurisë profesionale të Italisë, për të cilën nuk ka ngurruar ta shprehë pakënaqësinë as Ermal Meta.
Por çfarë thuhej për këngën e Eugentit në Eurovizion? Kush nga konkurrentët e përgëzoi delegacionin shqiptar pas finales dhe a pati ndonjë të papritur gjatë qëndrimit në Lisbonë, të gjitha këto mund t’i lexoni në intervistën e mëposhtme të sopranos Erinda Agolli për Iconstyle.al.
1.Ke prekur shumë skena dhe ke dhuruar emocione plot në Shqipëri dhe jashtë, por si ishte të këndoje në Eurovizion?
Kam dhuruar dhe marrë shumë emocione në çdo ngjitje në skenë, e vogël apo e madhe, e muzikës klasike apo e asaj moderne brenda apo jashtë vendit. Të jesh para një publiku është gjithmonë emocionuese por skena e Eurovizionit ishte një magji më vete. Jo vetëm për faktin që Altice Arena është një nga më të mëdhatë në EU me një kapacitet 20.000 vende, jo vetëm që në këtë vend kanë performuar emrat më të njohur të muzikës klasike e asaj moderne si A.Bocelli, S.Brightman, Beyonce, Adele, Lady Gaga , Madona , E.Iglesias, A.Grande e shumë të tjerë por mbi të gjitha emocioni ishte kaq i madh sepse në këtë skenë kaq të madhe e me kaq histori, ne ngjiteshim për të performuar jo vetëm si artistë por të mbështjellë me një ndjenjë atdhetarizmi që e shumëfishonte emocionin.
2.Si u prit renditja e Shqipërisë në vend të 11-të nga grupi juaj?
Kjo pyetje më lë hapësirë për të thënë se sa e lumtur jam që eksperiencën time të parë në Eurovision e ndava me muzikantë aq të mire siç ishin Besnik Nikolli, Denis e Gerti Hima, Greta Radovani dhe i mrekullueshmi Eugent Bushpepa, përtej renditjes që nuk kishte aspak rëndësi …
Shqipëria është me fat që ka një vokal si ai i Gentit, ne jemi me fat që kemi një artist e njeri të mrekullueshëm si Genti mes nesh. Eurovizioni dëgjoi zërin më të mirë mashkull të këtij viti dhe jo vetëm…( jo vetëm mendimi im por edhe i sondazheve) . Renditja përsëri nuk ka rëndësi…
Personalisht nuk mendoja që do të ishim në vendin e 11 edhe pse kisha marrë parasysh mënyrën gjeopolitike të votimit në kalkulimet e mija. Sigurisht që nuk ishte ajo që prisnim madje ishim shumë larg asaj që vërtet meritonim në renditje poooor renditja nuk ka aspak rëndësi në Eurovizion, ajo që ka rëndësi është prezantimi i denjë …
3.Çfarë thuhej për këngën e Eugentit në Eurovizion? Disa zëra të brendshëm…
Nuk më vjen keq ta përsëris veten duke thënë që Genti i kalon kufijtë e normales, vokali i tij është i jashtëzakonshëm. Por nuk është rastësi ky talent … Ai është një talent i mbështjellë mirë me punë, i organizuar në detaje, i kuruar me shumë kujdes, ai është një artist që nuk resht së kërkuari nga vetja. Genti ushtrohej në çdo moment, ushtrime fryme, ushtrime diksioni, ushtrime zëri, gjithçka ne detaj. Genti shihej si një pretendent i vendit të parë për të gjitha këto cilësi dhe për vërtetësinë që kishte në skenë, për emocionin e bukur që i jepte këngës, të krijuar të gjithën vetë me një filozofi aspak minimaliste por gjithpërfshirëse.
4.Kush ju takoi për herë të parë menjëherë pas mbylljes së votimeve dhe shpalljes së fitueses?
Mbaj mend që edhe mbas shpalljes së këngës fituese vazhdonim të valëvisnim flamurët deri në daljen nga skena. Më pas jemi përshëndetur me disa prej artistëve të cilët na kanë përgëzuar për performancën, si Bullgaria, Danimarka, Hungaria etj… Ka qenë Drejtori i përgjithshëm i RTSH Z.Thoma Gellci që takuam, i cili kishte ardhur posaçërisht nga Tirana për të dëgjuar performacën e Shqipërise në natën finale të Eurovision.
5.A pati një reagim ose takim me Ermal Metën pasi juria italiane nuk i dha pikë Shqipërisë? (Përveç atij në Twitter)
Përveç atij në rrjetet sociale, Ermal Meta nuk ka ngurruar ta shprehë pakënaqësinë për mënyrën e votimit që bëri Italia kundrejt Shqipërisë edhe në përshëndetjen me delegacionin tonë.
6.Si e pritët vlerësimin e Azerbajxhanit me 12 pikë dhe Italisë me 0 pikë?
Surprizuese vota e Azerbaxhanit (më vjen të qesh edhe tani kur kujtoj reagimin tonë në atë moment) dhe sigurisht zhgënjyese vota e Italisë, aspak profesionale, madje e pajustifikueshme duke marrë parasysh aspektin gjeopolitik dhe faktin që Italia përfaqësohej nga një artist shqiptar ndër të tjera…
7.A pati ndonjë incident ose diçka të papritur që ndodhi gjatë qëndrimit tuaj në Lisbonë?
Po . Klima qe një e papritur e vërtetë (qesh). Ne e lamë Tiranën me një klimë të ngrohtë dhe me të mbërritur në aeroportin e Lisbonës shohim njerëz të mbështjellë në xhupa e pallto dhe ne nuk qemë aspak të përgatitur për këtë gjë. Ditët e para qenë të mbushura me shi dhe erë të ftohtë kështu që u desh t’u drejtoheshim qendrave tregtare për të sistemuar situatën me motin e ftohtë .
8.Sipas teje kush e meritonte fitoren në Eurovizion 2018?
“Mall” sigurisht dhe e them me shumë sinqeritet. Meritonte fitoren për të gjitha cilësitë e Gentit si artist, për kompozimin e bukur, për prezantimin në gjuhën shqipe të këngës, për faktin që nuk ishte një këngë e krijuar për kompeticion po si rezultat i një frymëzimi të pastër për faktin që pati një jehonë aq të mirë në Altice Arena dhe për performancën aq cilësore që bëri Genti në çdo provë e në të dyja shfaqjet, atë të Gjysmëfinales e Finales. Pas ‘Mall’ vinte Estonia që ishte totalisht brenda shijeve të mija muzikore.
9.Ku do ta shohim Erindën, pas Eurovizionit? Ndonjë projekt të ri?
Do të doja të kisha pushuar të paktën 2-3 ditë mbas mbërritjes në Tiranë por puna si Drejtoreshë në Programin e Muzikës në qendrën Lincoln si dhe jeta koncertale me “detyruan” të mos e ndërpres vrullin. I radhës do të jetë pas një jave, Festivali i përvitshëm i Romancës Shqiptare ku ndër të tjera do të këndoj edhe një romancë të kompozuar nga bashkëshorti im, kompozitori Alban Dhamo, provat kanë filluar. Paralelisht jam duke punuar edhe për një tjetër projekt të madh që lidhet me Inaugurimin e Amfiteatrit pranë Liqenit që do të jetë në fund të muajit si dhe një tjetër projekt jashtë Shqipërie, konkretisht Parisi është ai që më pret në muajin qershor. Kjo sa i takon planeve të afërta. Ato në perspektivë janë në rrugë të mbarë dhe shpresoj që nga tetori të kem disa lajme vërtet të mira të cilat për momentin nuk po i zbuloj.
Burimi: Iconstyle.al
