Një tjetër artist i njohur shqiptar po mendon të lërë përfundimisht Shqipërinë për të jetuar në SHBA.
Edhe pse nuk ishte në planet e tij të ishte rreth këtij vendimi, ende të pamarrë, i kontaktuar nga Panorama, kompozitori Shpëtim Saraçi pranon se është duke e menduar seriozisht largimin dhe për këtë ka arsyet e tij.
Përpos faktit që është i zhgënjyer nga vendi i punës në të cilët kontribuoi gjatë gjithë jetës së tij, arsyeja tjetër është e ardhmja e fëmijëve, vajza e çiftit, Era prej pak vitesh ndjek studimet në Amerikë.
“Ajo që është e sigurt , është që po mundohemi të ndihmojmë fëmijët të shkollohen në një sistem të konsoliduar dhe jemi në kohën kur çdo familje në botë e bën këtë gjë…Për të tjerat, çdo gjë është fakultative. Di që departamentin e punës në Radio Televizionin Publik Shqiptar që drejtoja, na e shkrinë (një redaksi me traditë 55-vjeçare) në emër të krijimit të disa strukturave të reja që nuk ekzistojnë në asnjë vend të botës. Di që punova me gjithë shpirt dhe pasion, për rreth 30 vite në Shqipëri (ku pësova dhe trauma shëndetësore, që mund të më kushtonin dhe jetën) prapë së prapë përfundova duke mbrojtur të drejtën time nëpër gjyqe”, u shpreh ai.
Përpos pakënaqësive dhe zhgënjimeve, Saraç tregon se në fund të ditës ajo çfarë nuk ka ndryshuar është dashuria për njerëzit.
“Megjithatë njerëzit e vendit tim i dua e i respektoj pafund”- u shpreh Saraçi, teksa i duket e trishtë fakti që është i detyruar të vendosë nëse duhet të qëndrojë apo të largohet nga vetë vendi i tij.
