Parlamenti i Maqedonisë miratoi këtë të premte ndryshimet kushtetuese për emrin zyrtar të Maqedonisë.
Të 81 deputetët e pranishëm në seancën plenare të Kuvendit maqedonas votuan pro amendamenteve kushtetuese për emrin Republika e Maqedonisë së Veriut
Shkupi mbyll kështu betejën e gjatë që i hap rrugën anëtarësimit në NATO dhe Bashkimin Europian.
Kryeministri Zoran Zaev siguroi 81 vota për të miratuar ndryshimet në Kuvendin me 120 anëtarë. Pro votuan edhe të gjitha partitë shqiptare, edhe ato në opozitë, pas një marrëveshjeje që Zaev arriti me kryetarin e Lëvizjes Besa, pak para se të niste votimi në seancë.
Ndërkohë, jashtë Parlamentit në Shkup kanë nisur protestat e opozitës që janë kundër marrëveshjes. Tashmë “loja” nis në Athinë, ku marrëveshja duhet të miratohet nga Parlamenti i Greqisë dhe kryeministri Alexis Tsipras nuk ka një betejë të lehtë.
