Siç të gjithë e kemi parë, përgjatë kohëve të fundit rrjeti social i TikTok është kthyer në një “kazan” ku qarkullojnë shumë video të cilat nuk kanë për qëllim përcjelljen e një mesazhi të denjë për publikun por janë të dëmshme për këtë të fundit!
Lidhur me këtë, AMA, Autoriteti i Mediave Audiovizive ka arritur një marrëveshje bashkëpunimi me TikTok për eliminimin e përmbajtjeve të dëmshme të postuara në platformë.
Kjo gjë u bë e ditur përmes një postimi në rrjetet sociale nga Armela Krasniqi, kryetare e AMA-s, e cila tregoi se tashmë ankesat e qytetarëve do t’i transmetohen drejtpërdrejt TikTok për eliminimin e përmbajtjeve të papërshtatshme në platformë.
“Kemi vendosur bashkëpunim me platformën TikTok.
Çdo përmbajtje e dëmshme e publikuar në këtë platformë, do të regjistrohet në kanalin e hapur për llogari të AMA-s, për t’u shqyrtuar dhe, nëse nga ekipet tona do të konsiderohet si e tillë, do të marrim masat e nevojshme.
Duke filluar nga sot, ju ftoj të raportoni në linkun e dedikuar, në faqen zyrtare të AMA-s, çdo përmbajtje të dëmshme sipas mendimit tuaj, që shfaq apo nxit dhunë, që përmban gjuhë urrejtje, që shkel të drejtat e fëmijëve dhe komuniteteve.
Çdo përmbajtje që cenon liritë tona duhet ndaluar.
#Bashkërregullimi është tashmë formula e gjithëpranuar për një treg mediatik të dobishëm për të gjithë dhe ne mund të bëhemi pjesë aktive e këtij procesi”.
