Duket se më në fund, SPAK po vendos duart edhe në pastrimin e kupolës së lartë të politikës 32-vjeçare, pasi ka vënë sonte në pranga në Rinas dhëndrin e ish-kryeministrit Sali Berisha, Malltezin, për privatizimin e ish-klubit sportiv “Partizani”.
Ndërkohë që Malltezi është vendosur në pranga, bashkë me të është arrestuar edhe Fatmir Bektashi, bashkëpronar i Malltezit për ndërtimin e ish-kompleksit “Partizani”.
Për ish-kryeministrin Berisha është dhënë masa detyrim paraqitje. Madje atij i është bllokuar edhe pasaporta, duke iu ndaluar dalja jashtë vendit.
Duke synuar t’i shpëtojë SPAK, Berisha po sulmonte prej kohësh prokuroren e çështjes, Enkeleda Millonai, e cila me dosjen e saj do të trondisë familjen e ish-kryeministrit. Madje, ky i fundit ka lajmëruar sonte një konferencë të jashtëzakonshme për mediat.
Mbi kompleksin e klubit sportiv “Partizani”, dikur në pronësi të Ministrisë së Mbrojtjes, ngrihen sot 17 kulla të larta të kompleksit “Magnet 1” dhe “Magnet 2”, ku Jamarbër Malltezi është bashkëpronar me mbi 40% të aksioneve.
Privatizimi i kësaj qendre sportive 26,000 metra katror, që në fund u pagua vetëm 14,000 euro, nisi që në nëntor 2005, vetëm dy muaj pas marrjes së detyrës Ministri i Ekonomisë Genc Ruli dhe ministri i Mbrojtjes Fatmir Mediu.
Kjo lëvizje është një dritë shprese në fund të tunelit nga SPAK, që do të kalojë më në fund në filtrin e drejtësisë edhe kupolën qeveritare!
