Blorgerja shqiptare, Armina Mevlani, është përfshirë prej kohësh në botën e modës jashtë kufijve. Ndërsa ka marrë pjesë në javët e modës në shtete të ndryshme të botës, tani Armina zgjodhi që të ishte pjesë e një fushate ndërkombëtare, në të cilin veç të tjerash përfaqëson edhe Shqipërinë.
Ajo është një fanse e këpucëve të “Sophia Webster”, por nga kliente tashmë, Mevlani kalon në rolin e bashkëpunëtores. Projekti bazohet te rritja e sensibilizimit për të drejtat e femrave.
“Ndihem e lumtur përtej fjalëve që jam zgjedhur si përfaqësuese e vendit tim Shqipërisë në një projekt ndërkombëtar për rritjen e ndërgjeshmërisë të të drejtave të femrave në bashkëpunim me krijuesen e mirënjohur të këpucëve Sophia Webster. Kjo çantë ka udhëtuar botën dhe çdo përfaqësuese ka nga një mesazh brenda çantës”, shkruan Armina në “Facebook”, lidhur me detajet e fushatës.
Por cili është mesazhi që u ka dërguar Armina femrave kudo në botë?
Është një mesazh i thjeshtë, por harrojmë që t’i japim rëndësi gjatë jetës sonë. “Duaje veten”! Kur është hera e fundit që keni menduar fuqinë e kësaj fjale kaq të thjeshtë?
“Unë zgjedh shprehje “Duaje veten”! Mendoj se gjithçka nis duke dashur dhe duke vlerësuar veten, vlerat tona dhe duke ditur sa specialë jemi. Vetëm nëse dimë të duam dhe vlerësojmë veten, atëherë do të vlerësohemi edhe nga të tjerët. Mendoj se çdo qenie njerëzore është speciale dhe të gjithë duhet ta dimë këtë dhe të besojmë tek vetvetja”, shprehet Armina për fushatën e “Sophia Webster”.
Burimi: Facebook/ Sophiawebster.com
