Presidenti i SHBA-së, Donald Trump, e ka cilësuar si një “ditë të madhe për paqen botërore” arritjen e një marrëveshjeje për armëpushim dyjavor mes Shteteve të Bashkuara të Amerikës dhe Iranit, duke ngritur pritshmëri për një fazë të re stabiliteti në Lindjen e Mesme.
Në një reagim në platformën Truth Social, Trump theksoi se kjo marrëveshje përbën një hap konkret drejt uljes së tensioneve, ndërsa shtoi se SHBA do të luajë një rol aktiv në garantimin e lëvizjes së lirë në Ngushticën e Hormuzit, një nga arteriet më të rëndësishme për tregtinë globale të energjisë.
“Një ditë e madhe për paqen botërore! Irani dëshiron që kjo të ndodhë… Do të ketë shumë zhvillime pozitive dhe përfitime ekonomike”, është shprehur ai, duke lënë të kuptohet se marrëveshja mund të ndikojë edhe në rimëkëmbjen ekonomike të Teheranit.
Presidenti amerikan u shfaq optimist për zbatimin e armëpushimit, duke theksuar se administrata e tij do të monitorojë nga afër situatën për të siguruar respektimin e angazhimeve nga të dyja palët. Ai madje e përshkroi këtë moment si potencialisht fillimin e një “Epoke të Artë” për Lindjen e Mesme.
Në të njëjtën kohë, Trump sugjeroi se Kina mund të ketë luajtur një rol kyç në afrimin e Iranit drejt negociatave, duke ndikuar në vendimin për të pranuar marrëveshjen.
Marrëveshja dyjavore shihet si një test i rëndësishëm për marrëdhëniet mes Uashingtonit dhe Teheranit, ndërsa mbetet për t’u parë nëse ajo do të shërbejë si bazë për një marrëveshje më afatgjatë.
