Stadiumi “Arena Kombëtare” do të jetë gati për ndeshjen e Kombëtares Shqiptare të futbollit me Francën në 17 nëntor.
Punimet e fundit që gjithçka të jetë gati u inspektuan nga kryetari i Bashkisë së Tiranës, Erion Veliaj dhe arkitekti i njohur italian, Marco Casamonti, i cili ka realizuar projektin e stadiumit.
“Kombëtarja ka shëtitur në disa qytete, ka qenë diçka shumë e mirë sepse ka inkurajuar shpirtin e futbollit edhe në qytetet e tjera, ama shtëpia e vërtetë është Tirana. Por, stadiumi i ri është një bizhu; arkitektët, kolegët e federatës, kolegët ndërtues dhe konstruktorë, kanë bërë një punë të jashtëzakonshme”, tha ai.
Kryebashkiaku garantoi qytetarët se sikurse u punua me standarde të larta për stadiumin e kombëtares, edhe Teatri i ri Kombëtar apo Kopshti Botanik do të jenë “bizhutë e reja të kryeqytetit”.
Projekti i radhës, i cili pritet të nisë shumë shpejt, është ai i transformimit të Piramidës në qendrën më të madhe të teknologjisë së informacionit.
